Besnik Tahiri, kryetar i Grupit Parlamentar të Aleancës, vlerësoi se Lëvizja Vetëvendosje nuk po tregon reflektim lidhur me zgjedhjen e presidentit të Kosovës.
Të lidhura
None found
Duke folur pas seancës së Kuvendit të Kosovës, ai tha se situata po vazhdon të përsëritet, pa ndryshime domethënëse.
Me vetëm tetë ditë të mbetura deri në zgjedhjen e presidentit të ri, Tahiri theksoi se Kosovës i duhet një qasje serioze, jo shpërfillje e gjendjes reale.
Tahiri tha se debati politik është përqendruar te akuzat dhe etiketimet, ndërsa problemet konkrete të vendit po lihen mënjanë. Ai përmendi përplasjet se kush është patriot apo spiun, i majtë apo i djathtë, si dhe diskutimet se kush po bën më shumë apo po qan më shumë, duke i cilësuar këto si lot krokodili. Sipas tij, deri më 6 tetor vendi duhet të vendosë nëse do të shkojë në zgjedhje apo do të vijojë rrugëtimin shtetëror, ndërsa kërkohet reflektim përpara se të merret vendimi. “Nuk shoh proces serioz, nuk shoh reflektim të situatës, shoh vazhdimësi të një situate e cila po na përsëritet”, deklaroi ai.
Tahiri komentoi edhe deklaratën për katërshen e UÇK-së, të miratuar në Kuvend. Ai e quajti atë një nismë të vonuar, por me rëndësi të madhe për çuarjen përpara të një agjende shtetërore, si për vendin, ashtu edhe për katërshen në Hagë.
Sipas tij, seanca ishte e rëndësishme, por duhej të mbahej më herët. Tahiri u shpreh se deklarimi politik shtetëror i miratuar nga deputetët ishte minimumi që mund të bënte Kuvendi i Kosovës, pasi zotimet e individëve në parti ekzistonin që nga dita e parë. Ai shtoi se ky është një zotim shtetëror i përfaqësuesve të popullit dhe kujtoi se Aleanca kishte kërkuar deklarimin, duke thënë se ishte i lumtur për kontributin e subjektit politik dhe për ndihmën në avancimin e agjendës në mbështetje të shtetit dhe të katër çlirimtarëve.
