Një problematikë që prish takimin në tryezën e integrimit!

Nënkryetari i PD-së, Belind Këlliçi, ka reaguar pas tryezës Shqipëri-BE, ku kryeministri Edi Rama ishte i pranishëm për të diskutuar procesin e integrimit europian.

Këlliçi ka akuzuar Ramën se e trajtoi me përçmim takimin dhe se, në vend të problematikave të procesit të integrimit, u ndal te batutat për motin, diellin dhe flamingot në Tiranë.

Ai nënvizon se sjellja e kryeministrit ishte aq e papërshtatshme saqë raportuesi për Shqipërinë pranë Parlamentit Europian iu përgjigj duke theksuar se pjesëmarrësit nuk ndodheshin aty për “shërbim meteorologjik”.

“Një problematikë që prish takimin në tryezën e integrimit!

Edi Rama u shfaq sot në tryezën Shqipëri-BE krejtësisht si ai problematiku pijanec që prish takimin.

Me një arrogancë të skajshme ai foli me përçmim për temën dhe me një mendjemadhësi boshe u bëri si i zgjuar përfaqësuesve të Brukselit dhe deputetëve shqiptarë.

Në një rend dite për sfidat drejt BE, ai nxori inatin me flamingot dhe foli për diellin dhe kohën e mirë në Tiranë.

Aq sa e detyroi raporterin për Shqipërinë pranë Parlamentit Europian, të thoshte se nuk jemi këtu për shërbim meteorologjik.

Rama la të kuptojë se ishte një takim i mërzitshëm dhe u largua sapo mbaroi batutat e tij të rëndomta.

Por problemet ngelen aty dhe janë të shkaktuara nga ai vetë. Si korrupsioni dhe pavarësia e drejtësisë.

Edhe atë mundësi që pati të adresojë thelbin e çështjes, problematiku që prish takimet, e shfrytëzoi për tezen e tij cinike se paska pakënaqësi në Shqipëri, pasi njerëzit e kanë kuptuar se mund të shkohet më lart.

Por me Edi Ramën, më lart po shkojnë vetëm skandalet dhe aferat. Kur flitej se nuk ka më keq se t'i kesh bashkëpunëtorët e ngushtë nën procedim për korrupsion, fshehje pasurie, pastrim parash e grup të strukturuar kriminal, na del shefja e Shërbimit Sekret që përkrah të kërkuarin nga drejtësia dhe i jep atij informacione të klasifikuara shtetërore.

Në këtë sens, Edi Rama ka të drejtë. Për zullume, ai e ka çuar vendin më lart”, shkruan Këlliçi./ CNA