I akuzuar për krime të lidhura me gjenocidin në Ruandë, 100 mijë paund garanci për të, nëse kushti financiar nuk plotësohet…

Vendimi u mor nga gjyqtari Mark Lucraft KC, i cili vendosi gjithashtu një sërë kushtesh të tjera për lirimin me kusht. Brown duhet të dorëzojë pasaportën dhe çdo dokument identifikimi kombëtar, të mos aplikojë për dokumente të reja udhëtimi ndërkombëtar, t’i nënshtrohet një ore policore në adresën e tij në Londër, të monitorohet elektronikisht dhe të paraqitet çdo ditë në polici.

Brown, 65 vjeç, më parë i njohur si Dr. Vincent Bajinya, akuzohet se ka vrarë, drejtuar ose inkurajuar vrasjen e pjesëtarëve të komunitetit Tutsi gjatë gjenocidit në Ruandë. Sipas akuzave, ai dyshohet se kishte një rol si “udhëheqës” ose “mbikëqyrës” të akteve të dhunshme të kryera nga persona të tjerë. Ai i mohon akuzat.

Sipas çështjes së ngritur nga autoritetet britanike, gjashtë persona dyshohet se u vranë mes 6 dhe 13 prillit, përfshirë tre anëtarë të së njëjtës familje, një shofer taksie, si dhe një nënë dhe djalin e saj të vogël. Viktimat e identifikuara janë Dominique Mukurarinda, Immaculee Mukankusi, Gerasi Rurangirwa, Leandre Mbogoye, Charlotte Kamaguja dhe Olivier Tuyishime.

Brown u akuzua pas një hetimi shtatëvjeçar britanik mbi vrasjet. Sipas autoriteteve, ai është personi i parë në Mbretërinë e Bashkuar që përballet me akuzë për gjenocid në lidhje me ngjarjet e Ruandës.

Garancia e vendosur nga gjyqtari është rritur ndjeshëm krahasuar me shumën prej 25 mijë paundësh të caktuar më herët nga gjykata e magjistratëve.

Brown është mjek i kualifikuar në Ruandë që nga vitet 1980. Ai më vonë drejtoi Departamentin e Shëndetit Familjar në Kigali. Në vitin 2006 punoi në organizatën bamirëse me bazë në Londër, Praxis, e cila ofron mbështetje për refugjatët, ndërsa ka shërbyer edhe në Task Forcën e Infermierëve për Refugjatët.

Gjenocidi në Ruandë ndodhi në vitin 1994 dhe zgjati rreth 100 ditë. Gjatë kësaj periudhe u vranë rreth 800 mijë persona, kryesisht pjesëtarë të komunitetit Tutsi dhe Hutu politikisht të moderuar.

Brown pritet të paraqitet sërish në Old Bailey më 9 tetor. Ndërkohë, hetimet britanike për vepra të tjera të dyshuara penale të lidhura me gjenocidin në Ruandë vijojnë.

Top Channel