Zjarr i madh në Memëlisht, rrezikohet zona pyjore

Një sipërfaqe me bimësi të ulët është përfshirë nga flakët në fshatin Memëlisht në Pogradec.

Zjarri është aktiv dhe po përhapet, i favorizuar edhe nga era, ndërsa flakët rrezikojnë të përfshijnë një sipërfaqe pyjore të ndodhur mbi fshat.

Shërbimet zjarrfikëse kanë mbërritur në vendngjarje dhe po punojnë për izolimin dhe neutralizimin e vatrës së zjarrit. Aktualisht në operacionin e shuarjes janë angazhuar dy automjete zjarrfikëse, një cisternë uji, si dhe dhjetëra zjarrfikës e banorë të zonës.

Për momentin nuk dihen shkaqet e rënies së zjarrit.

Për zbardhjen e rrethanave është ngritur një grup hetimor, i cili po punon për përcaktimin e shkakut të flakëve. Forcat në terren vijojnë ndërhyrjen për të parandaluar përhapjen e zjarrit drejt sipërfaqes pyjore dhe zonave të tjera pranë fshatit./CNA