Debate në Komision/ Korreshi-socialistëve: Po tallni b*thën me Reformën Territoriale, doni vota

Mbledhja e sotme e Komisionit të Ligjeve është shoqëruar me kundërshti dhe diskutime të ashpra mes opozitës dhe mazhorancës.

Në debat është përfshirë Drejtori i Financave në Ministrinë e Financave, Fran Brahimi; kryetari i Komisionit të Ligjeve, Ulsi Manja; si edhe deputeti i PD-së, Saimir Korreshi.

Korreshi e cilësoi reformën si një tallje të mazhorancës, që synon vetëm të grumbullojë vota pë PS-në.

Brahimi dhe Manja ndanë argumentet e tyre kundër Korreshit, ndërsa diskutimi u mbyll me vendimin e kryetarit të Komisionit për vijimin me çështje të tjera në rendin e ditës.

Pjesë nga debati:

Brahimi: Ministria e Financave dhe Këshilli i Ministrave e mbështet këtë nismë. Në vitin 2015 shpenzoheshin 130 milionë euro. Largimi i shërbimeve, 80-90% e tyre janë burokratike. Shërbimi publik gjendet nga celulari. Ulet kostoja dhe ofrohet shërbimi. Nëse bashkohen bashkë këto bashki që janë sugjeruar kursimi është mbi 30%. Shpenzimet për paga dhe dieta kthehen në investime.

Korreshi: Ky po tall by*ën. Jo ore, është duke tall by*ën ai. Unë të pyeta kush ka pasur performancë më të mirë, Divjaka apo Roskoveci?

Brahimi: Divjaka sigurisht. Tentativa për të shkuar në një ekonomi shkalle kursen para që shkojnë për investime të tjera. Pjesa më e madhe e shërbimeve do të jenë digjitale.

Korreshi: Cila nga bashkitë ka pasur performancë më të mirë, Divjaka apo Roskoveci?

Brahimi: Ta thashë, Divjaka patjetër.

Korreshi: Numri i punonjësve nga 2015-ta është shtuar apo ulur?

Brahimi: Është rritur me mbi 20 mijë punonjës. Mbi 14 mijë janë rritur nga shtimi i kompetencave. Mbi 5 mijë është rritja neto e punonjësve. Shkak shtimi i aseteve, kompetencave, punëve publike.

Manja: Nuk e ulni dot Franin ju se është aty që nga 1997-ta. Ka qenë aty edhe në kohën tuaj.

Korreshi: Faleminderit i nderuar z.kryetar se kjo reformë se sipas të dhënave të Maznikut, është bërë vetëm për të grumbulluar votat për PS, si e si t’i mblidhni mekanikisht duke shumëzuar dhe hequr bashkitë me prirje të djathtë. Natën e mirë dhe mirupafshim!

Manja: Me nder qofsh, vazhdojmë me rendin e ditës./CNA