Dy të rinj u arrestuan pasi akuzohen se janë autorë të disa vjedhjeve. Në pranga kanë rënë Leonard Rakipllari, 37 vjeç dhe Adnand Hupi, 32 vjeç të dy banues në Tiranë.
Këta shtetas ishin shpallur në kërkim pasi më datë 24.09.2026, kanë vjedhur një automjet në Kavajë dhe më pas janë larguar, pasi janë ndihmuar nga shtetasit Landi Dedej dhe Besmir Sula (të arrestuar), të cilët kanë kundërshtuar me dhunë punonjësit e Policisë.
Gjatë operacionit të koduar “Cooperation”, shërbimet e Policisë kanë lokalizuar automjetin me të cilin qarkullonin këta shtetas dhe i kanë bërë shenjë për ndalim, por ata nuk janë bindur dhe kanë kundërshtuar veprimet e punonjësve të Policisë.
Nga verifikimet rezultoi se automjeti me targa të huaja me të cilin qarkullonin këta shtetas ishte i vjedhur.
Nga hetimet dyshohet se këta shtetas, gjatë muajit shtator, në bashkëpunim me njëri-tjetrin, kanë vjedhur 3 automjete, në Durrës, ndërsa në Tiranë kanë vjedhur 2 automjete, në njërin rast duke kanosur me thikë, pronarin e automjetit.
Gjithashtu, dyshohet se më datë 17.09.2026, shtetasi Adnand Hupi ka vjedhur me dhunë një shumë parash (xhiron ditore), në një pikë karburanti, në Bulqizë.
Vijojnë hetimet për zbardhjen e vjedhjeve të tjera që mund të kenë kryer këta shtetas.
