Këshilli bashkiak i Belshit voton kundër bashkimit me Elbasanin

Belshi i tha jo bashkimit me Elbasanin, por debati më i fortë në Këshillin Bashkiak nuk ishte te rezultati, por te mënyra e votimit.

Shtatë këshilltarët e Partisë Demokratike votuan kundër reformës, ndërsa dhjetë këshilltarët e Partisë Socialiste zgjodhën të abstenojnë. Edhe pse propozimi nuk mori mbështetje, vota e socialistëve u shoqërua me përplasje argumentesh në sallë.

Këshilltarët e të dyja palëve mbrojtën qëndrimet e tyre, duke argumentuar se Belshi, me potencialin turistik dhe karakteristikat që plotëson si njësi vendore, duhet të vijojë të vetëadministrohet.

Në mbledhje morën pjesë edhe përfaqësues të shoqërisë civile, të cilët kundërshtuan bashkimin me Elbasanin dhe sollën argumente që lidhen me popullsinë dhe kriteret që, sipas tyre, e mbështesin vazhdimësinë e Bashkisë Belsh si njësi më vete.

Ndryshe nga debatet në sallën e Këshillit, jashtë saj spikati mungesa e angazhimit qytetar. Konsultimet publike për reformën u thirrën dy herë dhe dështuan në të dyja rastet, ndërsa mendimi i qytetarëve u mblodh vetëm nga një numër i kufizuar pjesëmarrësish në takimin e zhvilluar në qytet.