Një raportim i “Wall Street Journal” ka shkaktuar debat në politikën greke, pasi ambasadorja amerikane në Athinë, Kimberly Guilfoyle, dyshohet se ka deklaruar gjatë një darke me zyrtarë grekë dhe amerikanë se Shtetet e Bashkuara kishin ndikuar në ndryshimin e qeverisë së Rumanisë dhe se mund të bënin të njëjtën gjë edhe në Greqi.
Sipas raportimit, episodi ka ndodhur në mars, gjatë një darke në Athinë, ku Guilfoyle dyshohet se është përplasur në debat me ministrin grek të Energjisë, Stavros Papastavrou. Në atë kohë, diskutimet lidhen me situatën politike në Rumani dhe rënien e pritshme të qeverisë së drejtuar nga Ilie Bolojan.
Sipas personave të cituar nga “Wall Street Journal”, Guilfoyle i ka thënë Papastavrou se Shtetet e Bashkuara kishin qenë të përfshira në largimin e qeverisë rumune, ndërsa më pas ka deklaruar: “Ne mund t’ia bëjmë këtë çdo vendi që duam. Mund ta bëjmë edhe këtu”.
Papastavrou, sipas të njëjtit raportim, i është përgjigjur se Shtetet e Bashkuara nuk mund ta zëvendësonin qeverinë greke, pasi ajo ishte zgjedhur nga qytetarët. Avokati i Guilfoyle e ka kundërshtuar versionin e bisedës të publikuar nga gazeta amerikane.
Çështja ka shkaktuar reagime të forta nga partitë opozitare greke, të cilat i kanë kërkuar qeverisë së Kyriakos Mitsotakis të japë shpjegime për atë që pretendohet se ka ndodhur gjatë darkës.
PASOK deklaroi se vetëm qeveria dhe veçanërisht ministritë kompetente të Punëve të Jashtme dhe të Mjedisit e Energjisë kanë autoritetin për të sqaruar raportimin dhe për të verifikuar vërtetësinë e tij. Partia theksoi gjithashtu se Greqia është një demokraci e pavarur dhe sovrane.
Aleanca e së Majtës Greke (ELAS) i cilësoi deklaratat e pretenduara si “të paprecedenta dhe të papranueshme”, duke kërkuar që qeveria të sqarojë nëse incidenti ka ndodhur, përse nuk është bërë publik që prej muajit mars dhe nëse ka pasur ndonjë reagim zyrtar.
Edhe SYRIZA e konsideroi raportimin “jashtëzakonisht serioz”, duke kërkuar nga qeveria të mos vazhdojë të heshtë. Sipas partisë, nëse deklaratat rezultojnë të sakta, çështja do të kishte pasoja për mënyrën se si vlerësohen marrëdhëniet mes Athinës dhe Uashingtonit.
Ndërkohë, Partia Komuniste e Greqisë (KKE) ka akuzuar qeverinë se mban përgjegjësi dhe e ka lidhur çështjen edhe me vizitën e pritshme në Greqi të Sekretarit amerikan të Shtetit, Marco Rubio. KKE pretendon se vizita lidhet me avancimin e bashkëpunimit strategjik mes dy vendeve.
Në një zhvillim të fundit, qeveria greke ka mohuar se ka pasur ndonjë kërcënim ndaj saj. Zëdhënësi i qeverisë, Pavlos Marinakis, deklaroi se “nuk ka pasur kurrë çështje të kërcënimit të qeverisë greke”, duke shtuar se një situatë e tillë nuk do të ishte e pranueshme.
Në qendër të debatit është edhe Korridori Vertikal i Gazit, projekt që synon transportimin e gazit përmes Greqisë, Bullgarisë dhe Rumanisë drejt Europës Qendrore dhe Lindore. Guilfoyle është përfshirë në promovimin e këtij projekti dhe të përdorimit të gazit natyror të lëngshëm amerikan në rajon.
Pavarësisht reagimeve politike, pretendimet mbi bisedën në darkën e marsit mbeten të kontestuara, pasi raportimi i “Wall Street Journal” bazohet në dëshmi të personave të pranishëm ose të informuar për episodin, ndërsa avokati i ambasadores ka kundërshtuar përshkrimin e bisedës.