Rusia po ndërthur forma të ndryshme veprimi hibrid për të lëkundur vendosmërinë e vendeve që vijojnë të ndihmojnë Ukrainën. Këtë paralajmërim e dha të hënën Alexis Grinkevich, Komandanti Suprem i Forcave Aleate të NATO-s për Evropën, gjatë një dëshmie para parlamentarëve evropianë.
Të lidhura
None found
Sipas tij, synimi i Moskës është të krijojë pasiguri, të shtojë trysninë mbi qeveritë e kontinentit dhe të ndikojë përfundimisht në gatishmërinë e tyre për të vazhduar mbështetjen për Kievin.
Grinkevich tha se përgjigjja ndaj kësaj qasjeje nuk duhet të jetë zmbrapsja, por rritja e vullnetit politik për të qëndruar në krah të Ukrainës.
“Nëse ka një sulm hibrid ndaj vendit tuaj, forcimi i vullnetit për të mbështetur Ukrainën do t’u tregojë rusëve se strategjia e tyre nuk po funksionon dhe ndoshta do t’i bëjë ata të tërhiqen nga kjo strategji”, u shpreh ai.
Gjatë fjalës së tij, komandanti i NATO-s theksoi edhe nevojën që përgjegjësia për sulmet hibride të bëhet publike. Ai u kërkoi vendeve anëtare që, kur disponojnë prova të mjaftueshme dhe një nivel të lartë sigurie mbi origjinën e një sulmi, të identifikojnë publikisht shtetin përgjegjës.
Publikimi i autorëve të këtyre veprimeve, sipas Grinkevich, mund të ketë efekt parandalues, pasi do të shtonte koston politike për shtetet që i planifikojnë, i mbështesin ose i mundësojnë ato.
Ai paralajmëroi se aleatët e Ukrainës duhet të shmangin çdo përçarje të shkaktuar nga operacionet hibride dhe të mos lejojnë që këto veprime të kufizojnë ndihmën e vazhdueshme për Kievin.
Qëndrimet e Grinkevich u shprehën në një periudhë kur shqetësimi në Evropë për kërcënimet hibride është shtuar. Në këtë kuadër përfshihen sulmet kibernetike, aktet e sabotimit dhe operacione të tjera që qeveritë dhe shërbimet evropiane të sigurisë i kanë lidhur në raste të ndryshme me Rusinë ose me rrjete që dyshohet se veprojnë në interes të saj.
