“Manifesting” është kthyer në një nga trendet më të përhapura të viteve të fundit, nga vision board dhe afirmimet te journaling dhe metoda 3-6-9. Por a mund të sjellë realisht në jetën tonë atë që dëshirojmë?
Diskutimi u rikthye së fundmi edhe përmes Dua Lipës, pasi kënga e saj “Training Season”, e publikuar para lidhjes me aktorin Callum Turner, u interpretua në rrjetet sociale si një lloj “manifestimi” i partnerit që ajo dëshironte.
Megjithatë, nuk ka prova shkencore se mendimet apo dëshirat tona mund të “tërheqin” në mënyrë mistike njerëz apo ngjarje. Ajo që mund të ndikojë realisht është mënyra se si një objektiv i qartë orienton vëmendjen, motivimin dhe sjelljen.
Nëse një person përcakton qartë se çfarë kërkon, mund të bëhet më i vëmendshëm ndaj mundësive, të ndryshojë zakonet dhe të ndërmarrë hapa konkretë drejt objektivit. Në këtë kuptim, manifestimi mund të funksionojë më shumë si një mënyrë për të fokusuar mendjen sesa si një “porosi” drejtuar universit.
Edhe pse sot lidhet kryesisht me rrjetet sociale, ideja nuk është e re. Ajo lidhet me lëvizjen amerikane New Thought të shekullit XIX dhe më vonë me konceptin e “ligjit të tërheqjes”.
Këto ide u përhapën më tej përmes literaturës self-help, ndërsa në kulturën pop u rikthyen fuqishëm me librin dhe filmin “The Secret” të Rhonda Byrne.
Sot, versioni modern i manifestimit shfaqet përmes afirmimeve, vizualizimeve, vision board-eve dhe metodave si 3-6-9, ku një dëshirë shkruhet në mënyrë të përsëritur gjatë ditës.
Pjesa më konkrete nuk është ideja se universi do të plotësojë dëshirën, por qartësia mbi atë që kërkon.
Të përcaktosh një objektiv mund të të ndihmojë të kuptosh se cilët hapa duhet të ndërmarrësh, cilat mundësi të vësh re dhe cilat sjellje duhet të ndryshosh.
E njëjta gjë vlen edhe për marrëdhëniet. Të dish çfarë vlerash dhe cilësish kërkon te një partner mund të ndikojë në zgjedhjet që bën dhe në kufijtë që vendos.
