Një ngjarje e rëndë ka tronditur një familje në Brazil, ku 28-vjeçarja Cibele Marchis dhe nëna e saj 56-vjeçare, Maria Elisabete Nogueira, vdiqën nga kanceri me vetëm 10 orë diferencë.
Të lidhura
None found
Cibele u nda nga jeta të enjten, rreth orës 16:00, në një spital në Mogi Guaçu. Në orën 02:00 të së premtes, në një tjetër spital të qytetit, ndërroi jetë edhe Maria.
E njohur si specialiste e marketingut dixhital, Cibele ishte diagnostikuar në vitin 2024 me një lloj të rrallë dhe agresiv kanceri, i cili kishte nisur në gjëndrën mbiveshkore.
Afërsisht një vit më pas, Maria mësoi se kishte kancer në pankreas. Ajo kishte kërkuar ndihmë mjekësore për një shqetësim që mendonte se vinte nga gurët në tëmth, por ekzaminimet zbuluan sëmundjen.
Gjatë trajtimit, Cibele iu nënshtrua operacioneve dhe seancave të kimioterapisë. Në dhjetor të vitit 2025, familjarët u informuan se ajo ishte në ditët e fundit të jetës, pas disa infeksioneve të rënda.
Barbara Rodrigues dos Santos, një e afërme e familjes, tha se nëna dhe vajza ishin bërë mbështetja kryesore e njëra-tjetrës gjatë asaj periudhe.
Maria kishte agjëruar për 24 orë dhe ishte lutur për një mrekulli që vajza e saj të përmirësohej. Cibele më pas e kaloi krizën, doli nga spitali dhe u rikthye në përditshmërinë e saj.
“Ajo donte të jetonte”, tregoi Barbara. Sipas saj, Cibele nuk lejoi që sëmundja, shenjat e ndërhyrjeve kirurgjikale apo qesja e kolostomisë ta ndalonin së jetuari.
Në të njëjtën kohë, shëndeti i Marias po përkeqësohej me ritme të shpejta. Dhimbjet e forta e detyruan të përdorte morfinë dhe më 17 shtator ajo u shtrua në spital.
Takimi i fundit mes tyre ndodhi kur Cibele shkoi të vizitonte Marian gjatë qëndrimit të saj në spital. Rreth një javë më vonë, edhe gjendja e Cibeles u rëndua dhe ajo pati nevojë për trajtim mjekësor.
“Kur mora telefonatën të enjten, të gjithë menduan se bëhej fjalë për hallën time, jo për Cibele”, rrëfeu Rowilson Leandro da Costa, nipi i Marias dhe kushëriri i Cibeles.
Rowilson u mor me organizimin e ceremonisë mortore të Cibeles. Menjëherë pasi familja u kthye nga ceremonia, ai mori lajmin se kishte vdekur edhe Maria.
“M’u desh t’ia jepja sërish lajmin xhaxhait tim, i cili po vajtonte vajzën e tij, se kishte humbur edhe gruan”, tha ai.
Cibele ishte fëmija i vetëm i çiftit, ndaj pas vdekjes së saj dhe të bashkëshortes, babai mbeti i vetëm.
“Ai humbi familjen. Të kthehet në shtëpi dhe të mos gjejë më askënd aty është e trishtueshme, e vështirë”, u shpreh Rowilson.
Nënë e bijë kishin folur edhe për mundësinë që njëra prej tyre të vdiste para tjetrës. Të dyja kishin thënë se nuk dëshironin që e mbijetuara të merrte vesh për humbjen, nëse tjetra do të ishte ende gjallë.
“Asnjëra nuk donte ta shihte tjetrën të vdiste. E kishin thënë këtë herë me shaka e herë seriozisht, dhe pikërisht kështu ndodhi. Njëra nuk e mësoi kurrë se tjetra kishte vdekur”, tregoi Rowilson.
Cibele kishte dokumentuar publikisht edhe përballjen e saj me kancerin. Në mars, ajo publikoi një video gjatë marrjes së serumit dhe shkroi se, nëse problemi i vetëm i dikujt janë paratë, duhet të ndihet mirënjohës, pasi ekzistojnë probleme që nuk zgjidhen as me gjithë pasurinë e botës.
Eloa Righi, partnerja e saj e biznesit, tha se Cibele nuk e lejoi sëmundjen të përcaktonte se kush ishte ajo.
“Ajo nuk donte të njihej si Cibele që ka kancer, por si Cibele që punon, argëtohet, jeton dhe ka kancer”, u shpreh Righi.
Maria, të cilën të afërmit e thërrisnin Bia, kujtohet si një grua e dashur dhe e gëzuar, që kishte lënë gjurmë te njerëzit me të cilët ishte njohur.
Nënë e bijë u përcollën së bashku në banesën e fundit, gjatë një ceremonie të përbashkët mortore ku morën pjesë familjarët dhe miqtë e tyre.
