Nicole Scherzinger ka pësuar një djegie të dhimbshme në këmbë vetëm një orë para se të ngjitej në skenë me “Pussycat Dolls” në Dyseldorf të Gjermanisë, por pavarësisht incidentit, këngëtarja nuk e anuloi performancën.

48-vjeçarja ka treguar vetë për incidentin përmes një postimi në “Instagram”, ku ka publikuar edhe një fotografi të këmbës së saj. Në foto dallohen skuqje dhe flluska të shkaktuara nga uji i valuar.

“Është e mrekullueshme kur uji i valuar të bie në këmbë një orë para performancës. Por shfaqja duhet të vazhdojë”, shkroi Scherzinger në “Instastory”, duke iu referuar incidentit që ndodhi pak para koncertit të 26 shtatorit.

Pavarësisht dëmtimit, këngëtarja doli në skenën e PSD Bank Dome në Dyseldorf, ku performoi së bashku me Ashley Roberts dhe Kimberly Wyatt.

Pas përfundimit të koncertit, Scherzinger falënderoi publikun në Dyseldorf për mbështetjen, ndërsa bëri me dije se turneu do të vijojë me ndalesën e radhës në Amsterdam.

Nicole Scherzinger dhe “Pussycat Dolls” janë aktualisht në turneun “PCD Forever”, i cili shënon rikthimin e grupit në skenat ndërkombëtare.