Kantautorët dhe instrumentistët e thirrur këtë të hënë në Komisionin e Kulturës kërkuan ndryshime në projektligjin për të drejtat e autorit, me qëllim që të ardhurat të shpërndahen në mënyrë të drejtë. Artistët kritikuan veprimtarinë e SUADA, sportelit unik për administrimin e të drejtës së autorit. Sipas tyre, të ardhurat që mbledh kjo agjenci vetëm janë pakësuar, vit pas viti. Elton Deda - Ky sportel të funksiononte dhe çdo agjenci të merrte të ardhurat e veta. U bë shumë vite që kjo nuk funksionon fare. Kur SUADA nuk ishte, autorët kanë marrë më shumë para! Dëshiroj që kjo pjesë duhet parë, ndoshta sporteli unik është një sportel i panevojshëm. U bë vite që kjo gjë nuk po funksionon. Adrian Hila – Kjo është një tabelë e pagesave që ka mbledhur SUADA. Shikoni diferencën nga 2018 në 2024. Mendoj që sporteli unik duhet të jetë grup interesi. Për mendimin tim, duhet të jetë një sportel unik, por të funksionojë si Italia. Është agjencia e interpretëve që mbledh të gjitha të ardhurat dhe i shpërndan. Ky sportel duhet që të jetë funksional dhe duhet të jetë një grup interesi sepse kështu nuk funksionon. Duke qenë SUADA në mes merr goxha përqindje të të ardhurave. Ina Zhupa – Tabela na vuri përballë një shoku. Një x kabllor nga 8 milionë, ka paguar 1 milionë, çfarë ka ndodhur?! Në 2019 qenkan 270 bar kafe, tani 13. Pse kaq ndryshim. Unë do të kërkoj përgjigjet e duhura nga institucionet. Erion Malaj – Tabela është marrë nga sporteli unik se më bën çudi kjo diferencë? Më bën çudi që tani janë të gjitha vlerat të rrumbullakosura. Muzikantët kundërshtojnë dhe shtimin e agjencive, që thonë se do i vështirësonte procedurat për garantimin e të drejtave dhe mbledhjen e të ardhurave të autorëve. Elton Deda - Pajisja e shumë agjencive me licenca për të mbledhur të drejtat e autorëve, ne nuk na duket në rregull. Jemi në një pikë të errët të të drejtës së mbledhjes së të ardhurave