Ekspertja kanadeze e sigurisë kombëtare, Stephanie Carvin, e ka cilësuar si një ngjarje fatkeqe skandalin që lidhet me ish-drejtoren e SHISH, Vlora Hyseni, dhe dyshimet për transmetim të informacionit të klasifikuar te biznesmeni Ergys Agasi.
Në një intervistë në A2 CNN, Carvin tha se raste të tilla përbëjnë një shqetësim serioz për sigurinë kombëtare, sidomos kur një person me akses të privilegjuar në informacion dyshohet se e ka keqpërdorur atë.
Ajo theksoi se një nga pyetjet kryesore që duhet të marrë përgjigje është nëse bëhet fjalë për veprim individual apo nëse pas ngjarjes fshihet një rrjet më i gjerë.
“Është gjithmonë një sfidë, sepse kemi të bëjmë me operacione shumë sekrete dhe, në të njëjtën kohë, me nevojën për drejtësi publike. Jo gjithmonë është e lehtë, sepse gjatë hetimeve mund të dalin në publik informacione operacionale. Prandaj duhet treguar kujdes. Por kur një ngjarje e tillë trondit besimin, gjëja më e rëndësishme është rikthimi i këtij besimi.
Një hetim i plotë dhe sa më transparent që të jetë e mundur është shumë i rëndësishëm. Hetimi duhet të jetë i ndershëm, por edhe efikas, në mënyrë që e vërteta të dalë sa më shpejt dhe çështja të mos zvarritet. Gjithashtu, nëse ka indicie për lidhje të tjera, duhet të përcaktohet nëse kemi të bëjmë me një individ që ka vepruar i vetëm apo me një rrjet më të gjerë”, theksoi ajo.
Carvin solli edhe raste nga Kanadaja, duke theksuar se probleme të ngjashme janë shfaqur edhe në vende të tjera anëtare të NATO-s. Ajo përmendi rastin e ish-zyrtarit kanadez Cameron Ortis, i cili është akuzuar për transmetim informacioni te persona të lidhur me botën kriminale.
Sipas saj, keqpërdorimi i informacionit të klasifikuar mund t’u japë grupeve kriminale mundësi të kuptojnë se si po zhvillohen hetimet ndaj tyre dhe t’i ndihmojë të shmangin përgjimet apo operacionet e autoriteteve.
“Kur dikush abuzon me informacionin në këtë mënyrë, dëmton institucionin në disa drejtime. Fillimisht dëmton reputacionin e organizatës, por gjithashtu mund të pengojë drejtpërdrejt hetimet kriminale dhe punën e shërbimeve të inteligjencës”, deklaroi Carvin.
Ekspertja paralajmëroi gjithashtu për një tjetër pasojë të mundshme, dëmtimin e marrëdhënieve me partnerët ndërkombëtarë. Sipas saj, nëse një aleat humbet besimin se informacionet sensitive do të mbrohen, mund të bëhet më i rezervuar në ndarjen e të dhënave të klasifikuara.
“Personat përgjegjës duhet të mbahen para përgjegjësisë, nëse fajësia e tyre provohet. Kjo është mënyra se si mund të rikthehet besimi i publikut”, përfundoi ajo.
