Qytetarë të shumtë janë mbledhur sërish të hënën mbrëma në Sheshin “Skënderbeu” në Prishtinë, në kuadër të protestës “Jo në emrin tim”, e cila kundërshton aktgjykimin dënues të Dhomave të Specializuara në Hagë ndaj ish-drejtuesve të Ushtrisë Çlirimtare të Kosovës.
Kjo është nata e 13-të radhazi që qytetarët mblidhen në qendër të Prishtinës për të shprehur kundërshtimin ndaj aktgjykimit, i cili u shpall më 16 shtator.
Protesta e së hënës u zhvillua në të njëjtën ditë kur Kuvendi i Kosovës miratoi një deklaratë lidhur me vendimin e Gjykatës Speciale.
Në deklaratën e miratuar nga deputetët thuhet se Kuvendi e konsideron të papranueshëm përfundimin e gjykatës lidhur me ekzistencën e një “qëllimi të përbashkët kriminal”.
Përveç protestave në rrugë dhe reagimeve politike, janë shtuar edhe kërkesat për përshpejtimin e procedurave për ndryshimin dhe plotësimin e projektligjit që lidhet me Dhomat e Specializuara, me qëllim shqyrtimin dhe votimin e tij në Kuvend.
Protesta “Jo në emrin tim” nisi më 16 shtator, menjëherë pas shpalljes së aktgjykimit në Hagë, dhe prej atëherë është zhvilluar çdo mbrëmje në qendër të Prishtinës.
Pjesëmarrësit kërkojnë që kundërshtimi ndaj aktgjykimit të shoqërohet edhe me hapa institucionalë dhe politikë, përmes të cilëve synojnë të shprehin qëndrimin e tyre ndaj vendimit të gjykatës.