Përjashtohet Kosova, plani i BE-së për mbylljen e bisedimeve me Shqipërinë

Bashkimi Europian po harton propozime që do t’u jepnin katër vendeve më të afërta me unionin një rrugë të qartë dhe hap pas hapi drejt anëtarësimit.

Po shqyrtohen “udhërrëfyes” të synuar për Malin e Zi, Ukrainën, Moldavinë dhe Shqipërinë, thanë për POLITICO dy zyrtarë të lartë të Komisionit Evropian që punojnë në draft propozimet, si pjesë e përpjekjeve për të përshpejtuar procesin dekadash të gjatë.

Të katër vendet shihen si favorite për t'u anëtarësuar në BE, por ende përballen me përparim të ngadaltë dhe afate kohore të paqarta se kur mund të pranohen zyrtarisht. Ndërsa Brukseli i ka mbështetur prej kohësh kërkesat e tyre për anëtarësim, udhërrëfyesit shënojnë herën e parë që atyre do t'u jepen garanci se nëse vazhdojnë me reformat thelbësore, do të pranohen - dhe do të ofrohen afate kohore treguese për përfundimin e negociatave.

Planet do ta bëjnë më të qartë se çfarë pritet nga secili vend kandidat, tha një nga zyrtarët, si dhe do të krijojnë detyrime për anëtarët aktualë, të cilët duhet të japin miratimin e tyre që procesi të ecë përpara. Planet gjithashtu përcaktojnë data të përafërta se kur grupet e reformave, të njohura si "grupe" negociuese, do të përfundojnë zyrtarisht - momente të rëndësishme në rrugën drejt anëtarësimit.

Zyrtarët konfirmuan se vendeve të tjera kandidate në një fazë më të hershme të procesit, si Kosova, Maqedonia e Veriut dhe Bosnja dhe Hercegovina, nuk do t'u ofrohen udhërrëfyesit në këtë fazë. As Gjeorgjia, Turqia apo Serbia, të cilat kanë parë aplikimet e tyre të ndalen për shkak të shqetësimeve rreth prapambetjes demokratike dhe gjyqësore.

Shqipëria ka hapur tashmë të 33 kapitujt negociues dhe në muajin korrik mbylli tre prej tyre: shkencën dhe kërkimin, arsimin dhe kulturën, si dhe marrëdhëniet me jashtë.

“Politico” thekson gjithashtu se dy data të tjera janë vendimtare. 6 tetori, kur pritet të paraqitet rishikimi i politikës së para-anëtarësimit, dhe 15-16 tetori, kur liderët e unionit do të diskutojnë zgjerimin dhe reformat e brendshme. Ndërkohë, këtë javë Presidentja e Komisionit Evropian, Ursula von der Leyen, udhëton drejt Ballkanit Perëndimor për bisedime me udhëheqësit e Shqipërisë, Malit të Zi, Maqedonisë së Veriut dhe Kosovës, por shmang Bosnjë-Hercegovinën dhe Serbinë, që janë në mes të zgjedhjeve kombëtare. (A2 Televizion)