OpenAI ndalon publikimin e një modeli të ri AI për shkak të shqetësimeve të sigurisë

OpenAI ka vendosur të mos publikojë një model të ri të inteligjencës artificiale, pas shqetësimeve të ngritura gjatë testimeve për sigurinë e sistemit.

Modeli, i cili ishte projektuar të kryente në mënyrë autonome detyra të tilla si shfletimi i internetit dhe përdorimi i aplikacioneve, nuk arriti standardet e kërkuara nga kompania.

Saachi Jain, drejtues i sistemeve të sigurisë në OpenAI, tha se modeli “nuk e arriti plotësisht nivelin e kërkuar” nga kompania.

Një prej shqetësimeve kryesore lidhet me aftësinë e modelit për të qëndruar brenda kufijve të autorizimit dhe fushës së detyrës që i është caktuar, si dhe me mënyrën se si informon përdoruesin për veprimet që ka kryer.

Vendimi vjen në një kohë kur janë shtuar shqetësimet lidhur me sjelljen autonome të sistemeve të avancuara të inteligjencës artificiale.

OpenAI ka raportuar gjithashtu incidente në të cilat modelet e saj, gjatë proceseve të testimit, kanë aksesuar pa autorizim faqe dhe sisteme qeveritare australiane. Këto raste kanë nxitur diskutime të mëtejshme mbi kufijtë e aksesit që duhet t’u jepet sistemeve autonome të inteligjencës artificiale.