Sheikh Mohamed bin Zayed al-Nahyan, presidenti i Emirateve të Bashkuara Arabe, ka konfirmuar se kryeministri izraelit Benjamin Netanyahu ka zhvilluar një vizitë të fshehtë në Abu Dhabi.
Të lidhura
None found
Konfirmimi u bë publik përmes agjencisë shtetërore të lajmeve të Emirateve dhe përbën njoftimin e parë zyrtar nga Abu Dhabi lidhur me udhëtimin e Netanyahut.
Sipas agjencisë, gjatë takimit u shqyrtuan marrëdhëniet dypalëshe mes Emirateve të Bashkuara Arabe dhe Izraelit, si dhe mundësitë për forcimin dhe zhvillimin e mëtejshëm të tyre. Ky njoftim konfirmoi raportimet e mëparshme të mediave izraelite.
Ndërkohë, në Izrael, shërbimi i sigurisë së brendshme Shin Bet ka depozituar një ankesë kundër kanalit televiziv që bëri publike të dielën vizitën e paparalajmëruar të kryeministrit.
Zyra e kryeministrit deklaroi se Shin Bet i është drejtuar zyrtarisht kreut të censurës ushtarake, duke kërkuar ndjekjen penale të Channel 12 për shkelje të rënda të rregullave të censurës ushtarake.
Të dielën, Channel 12 dhe organe të tjera mediatike në Izrael raportuan se Netanyahu kishte udhëtuar papritur drejt Abu Dhabit. Ndërkohë, gazeta Haaretz kishte shkruar në ditët para vizitës se Emiratet e Bashkuara Arabe e kishin informuar Netanyahun, pak para sulmeve të 7 tetorit 2023, se Hamasi po përgatiste një operacion kundër Izraelit, por ky informacion nuk u ishte përcjellë shërbimeve të sigurisë.
Netanyahu i ka mohuar këto pretendime, duke thënë se nuk kishte marrë një paralajmërim të tillë. Mediat izraelite raportuan se qëllimi i udhëtimit ishte t’i kërkonte Mohammed bin Zayed të kundërshtonte publikisht pretendimin se e kishte njoftuar kryeministrin në vitin 2023.
Zyra e kryeministrit tha se publikimi i lajmit për vizitën kishte vënë në rrezik jetën e Netanyahut, bashkëshortes së tij dhe anëtarëve të delegacionit, mes tyre edhe kreun e Mossadit. Sipas deklaratës, lajmi u bë publik në një moment kur avioni i kryeministrit ndodhej “jashtë hapësirës ajrore izraelite”.
