Tre persona kanë përfunduar në spital pas një episodi të dhunshëm të regjistruar në një pikë karburanti në periferi të Reggio Emilia-s, në Itali. Një 26-vjeçar dyshohet se fillimisht sulmoi një grua me kaçavidë dhe më pas përdori automjetin për të goditur dy persona që ndërhynë për ta ndihmuar. Ngjarja ndodhi rreth orës 19:00 në zonën Due Maestà. Sipas rindërtimit paraprak të autoriteteve, gjithçka nisi teksa një 57-vjeçare nga Scandiano po furnizonte automjetin e saj me karburant.
Në rrethana që mbeten ende të paqarta, i riu dyshohet se zbriti nga makina dhe iu drejtua gruas, duke e goditur me një kaçavidë. Skena u pa nga persona të tjerë që ndodheshin aty. Një 26-vjeçare dhe një 49-vjeçar tentuan të ndërhynin për t’i ardhur në ndihmë gruas së sulmuar. Por situata u përshkallëzua edhe më tej. Sipas hetimeve të deritanishme, autori i dyshuar hipi sërish në automjet dhe goditi me makinë dy personat që kishin ndërhyrë, përpara se të largohej nga pika e karburantit. Në kërkim të tij u vunë disa struktura të policisë italiane. Rreth një orë pas ngjarjes, 26-vjeçari, i lindur në Reggio Emilia, u lokalizua dhe u arrestua.
Të tre të plagosurit u dërguan me urgjencë në spital për trajtim mjekësor. Gjendja e tyre është raportuar si e rëndë. Hetuesit po përpiqen të përcaktojnë se çfarë e shkaktoi sulmin, pasi deri tani nuk është bërë i ditur një motiv. Autoritetet po verifikojnë gjithashtu rrethanat personale të të arrestuarit dhe faktorët që mund të kenë çuar në episodin e dhunshëm.
