Depozitat që bizneset dhe individët kanë në banka kanë vazhduar rritjen në gusht, por ndryshe nga korriku kur dominonte monedha vendase, janë udhëhequr nga kursimet në valutë, të ndikuara nga efektet sezonale të turizmit.
Sipas të dhënave të publikuara nga banka e Shqipërisë, në gusht, stoku i depozitave në lekë arriti në 789.4 miliardë lekë. Në krahasim me korrikun e po këtij viti, kursimet u rritën me gati 1%, ose 7.5 miliardë lekë.
Rritja është shumë më e ngadaltë se periudha prill-korrik, kur shtesa mujore i kishte kaluar 10 miliardë lekët.
Ndikimin kryesor në korrik e dhanë korporatat jo financiare, ndërsa shtesa e kursimeve të individëve ishte minimale.
Me bazë vjetore, (korrik 2026/korrik 2025), depozitat në lekë janë rritur me 17.5%, ose 118 miliardë lekë më shumë.
Ndryshe nga leku, që u ngadalësua, depozitat në valutë përshpejtuan ndjeshëm ritmet e rritjes në gusht, të ndikuara nga efektet sezonale, si të prurjeve të emigrantëve ashtu dhe të hyrave që vijnë nga turizmi, që arrin kulmin në muajin në fjalë.
Depozitat në euro, sipas statistikave të Bankës së Shqipërisë arritën në 9.5 miliardë lekë në korrik, me një rritje prej 2.54%, ose 236 milionë euro më shumë në krahasim me korrikun e 2026-s. Rritja erdhi si nga bizneset ashtu dhe individët.
Në gusht të një viti më parë, depozitat në euro ishin rritur me 227 milionë euro.
Me bazë vjetore, (korrik 2026/korrik 2025), depozitat në euro janë rritur me 12.3%, ose rreth 1 miliardë euro më shumë.
Të konvertuara në euro, me kursin aktual, shtesa vjetore totale e depozitave (gusht 2026/gusht 2025) ishte rreth 2.3 miliardë euro, me rreth 55% të shtesës që erdhi nga monedha vendase.
Banka e Shqipërisë raporton stokun e depozitave të konvertuara në lekë, që arriti në 1.58 miliardë lekë në gusht, nga të cilat 789 miliardë lekë në monedhën vendas, dhe po 789 miliardë lekë në euro, por vlera e euros e konvertuar në lekë është e zhvlerësuar, për shkak të kursit./ Monitor
