Një shpërthim i fortë ka ndodhur në një pikë karburanti “Ano Oil” në rrugën “Skënderbeu” në Sarandë.
Nga shpërthimi kanë mbetur të plagosur dy persona, të cilët janë transportuar për ndihmë mjekësore në urgjencën e Sarandës.
Sipas burimeve nga bluzat e bardha, të plagosurit janë Fatmir Pema, 39 vjeç, i cili ka pësuar djegie në trup, dhe Florian Bica, 27 vjeç, i cili është dërguar në spital pasi ka pësuar tronditje si pasojë e shpërthimit.
Sipas informacioneve, karburanti ka qenë i mbyllur për një periudhë tre mujore, ndërsa punonjësit po përgatitnin ambientin për ta bërë funksional.
Punëtorët e mirëmbajtjes së karburantit kanë qenë duke punuar me një mjet prerës, troko, dhe nga shkëndijat dyshohet të jetë shkaktuar shpërthimi.
Në vendngjarje kanë mbërritur forca të shumta policie dhe shërbimet zjarrfikëse, të cilat po punojnë për situatën.
Ngjarja vjen rreth tri javë pas shpërthimit në një pikë karburanti te Brryli në Tiranë, ku u dëmtuan tre punonjës.
