Shpërthim në një pikë karburanti në Sarandë, dy të plagosur

Një shpërthim i fortë është regjistruar këtë të martë në një pikë karburanti në Sarandë. Ngjarja mësohet se ka ndodhur në rrugën “Skënderbeu” dhe raportohet për dy të plagosur.

Ata janë transportuar menjëherë në urgjencën e spitalit të Sarandës. Nga informacionet e para, të plagosurit janë Fatmir Pema dhe Florian Bica.

Forca të shumta policie e zjarrfikëse janë në vendin e ngjarjes ndërsa po punohet për zbardhjen e shkaqeve të shpërthimit.

“Sarandë/Informacione paraprake Rreth orës 12:10, në lagjen nr. 1, në një pikë karburanti, dyshohet se gjatë pastrimit të depozitave të gazit ka ndodhur një shpërthim.

Si pasojë, janë dëmtuar dy punëtorë, shtetasit F. P., rreth 40 vjeç dhe F. B., rreth 27 vjeç, të cilët janë transportuar në spital për ndihmë mjekësore.

Nga shpërthimi janë shkaktuar edhe dëme materiale. Grupi hetimor ndodhet në vendngjarje dhe po kryen veprimet për zbardhjen dhe dokumentimin e rrethanave të rastit”, njofton policia.