“Mbështesim SPAK-un”/ Balla me gjuhën e Ramës për rastin e Vlora Hysenit

Kreu i Grupit Parlamentar të PS-së, Taulant Balla, ka folur në një deklaratë për media për arrestin e ish-drejtoreshës së SHISH-it, Vlora Hyseni.

Balla u shpreh nuk do të komentojë dosjet që hetohen nga SPAK-u, ndërsa shtoi se Partia Socialiste nuk është avokate mbrojtëse e askujt.

“Unë bëj pjesë tek ata që nuk i komentojnë dosjet e SPAK-ut, nuk kam komentuar as dosjet ku kam bërë akuzë unë, rasti i Sali Berishës dhe s’kam komentuar asnjëherë përmbajtje të dosjes. Me vendim gjykate, tanimë jemi të ndaluar për të komentuar mbi copëza bisedash. Janë dy standarde që ky grup parlamentar, mazhorancë, shumicë, i ka përcaktuar. Ne nuk hyjmë në meritën e dosjeve, nuk komentojmë përmbajtjen e dosjeve dhe çdo zyrtar duhet ta kontestojë kufizimin e lirisë të të gjitha formave në gjykatë. PS nuk është avokate mbrojtëse e askujt. Në rastin e personave me mandat parlamentar, Kuvendi i Shqipërisë përmes së drejtës që i ka dhënë sovrani, e ka ushtruar këtë të drejtë dhe dua të rishpreh që Shqipëria sa i përket pjesës që lidhet me kufizimet e lirisë para vendimit të gjykatës, duhet t’i japë fund kësaj praktike. Hyni në ChatGPT dhe pyeteni kush është 'delja e zezë' e Europës”, tha Balla.

Ndër të tjera, Balla tha se mbështesin punën e SPAK-ut për një hetim të pandikuar.

“Ne mbështesim SPAK-un të bëjë një hetim të pandikuar. Vlerësojmë punën e bërë nga SPAK-u. Rasti më domethënës është që i njëjti prokuror që heton rastin në fjalë, heton edhe udhëheqësin e opozitës. Nëse çdo të hënë udhëheqësi i opozitës sulmon prokurorinë, kjo është papranueshme. Sikurse ne duhet t’i garantojmë mbështetjen e plotë. Nuk ofrojmë mbështetje. Sa u përket arrestimeve pa gjyq, duhet të jetë standard, që Shqipërinë mos ta bëjmë 'dele të zezë' për paraburgimin. Rama ka të njëjtin standard gjithmonë, edhe në rastin në fjalë. Ndërkohë që ata që fërkojnë duart nga sukseset e reformës në drejtësi, duhet të mos harrojnë që është PS që e mori angazhimin, në 2016, pulat erdhën me kokën poshtë dhe duart lart, votuan vetëm ndryshimet në kushtetuese, më pas nuk erdhën për të votuar asnjërin prej ligjeve. Janë ata që udhëheqësi i tyre shan me libër shtëpie prokurorët e SPAK-ut, ndërkohë që standardi i PS-së, është që PS përshëndet në çdo rast punën hetimore të prokurorëve”, tha Balla. /CNA