Ilir Topi ka dhënë dorëheqjen nga detyra e drejtorit të Fondit të Detyrueshëm të Kujdesit Shëndetësor, ndërsa ...
KOSOVA
PDK-ja kërkon ndryshimin e Ligjit për Specialen para 6 tetorit
PiranjatPërditësimi i fundit 29 Shtator 2026, 13:47
Partia Demokratike e Kosovës (PDK) kërkoi të martën që ndryshimet e propozuara në Ligjin për Dhomat e Specializuara të Kosovës në Hagë të trajtohen para 6 tetorit, duke paralajmëruar se Kuvendi rrezikon të shpërndahet pa e shqyrtuar këtë nismë.
Deputeti i PDK-së, Përparim Gruda, theksoi se kanë mbetur edhe pak ditë deri në përfundimin e afatit për zgjedhjen e presidentit dhe se Kuvendi nuk duhet të shpërndahet pa e trajtuar projektligjin e PDK-së.
“Nuk mund të mos paralajmërojmë që është e papranueshme që të lejojmë që ky Kuvend të shpërbëhet – se duket që ky është qëllimi – pa e trajtuar këtë ligj”, tha Gruda.
Afati për zgjedhjen e presidentit përfundon më 6 tetor. Nëse presidenti nuk zgjidhet brenda këtij afati, Kuvendi shpërndahet dhe vendi shkon në zgjedhje të reja.
Gruda tha se edhe pse Qeveria ka 30 ditë për të dhënë mendimin për projektligjin, Kuvendit i kanë mbetur vetëm shtatë ditë për ta trajtuar atë.
“Nuk mund Kuvendi të mbetet peng i një zyre administrative. Kërkoj pak më shumë patriotizëm nga zyrtarët që punojnë në Qeveri”, tha ai.
Sipas Grudës, projektligji është hartuar me ekspertizë, por PDK-ja është e hapur për argumentet dhe propozimet e palëve të tjera.
Ai tha gjithashtu se projektligji parasheh që ndryshimet përkatëse të mos jenë nën kontrollin e Dhomës së Specializuar të Gjykatës Kushtetuese në Hagë, por të kontrollohen nga Gjykata Kushtetuese e Kosovës.
Ndërkaq, shefi i Grupit Parlamentar të PDK-së, Arian Tahiri, tha se projektligji nuk duhet të lidhet me zgjedhjen e presidentit.
“Ligji është mbi secilin kalkulim politik. Presidenti është konsensus politik, vullnet politik i subjekteve politike. Po, ligji e tejkalon këtë, ligji është obligim kombëtar i yni, obligim për gjakun e dëshmorëve, obligim për gjeneratat që kanë ardhur”, tha Tahiri.
PDK-ja e dorëzoi projektligjin në Kuvend më 21 shtator, disa ditë pasi Dhomat e Specializuara dënuan me gjithsej 81 vjet burgim katër ish-udhëheqës të UÇK-së: Hashim Thaçin, Jakup Krasniqin, Kadri Veselin dhe Rexhep Selimin.
Në dokumentin e propozuar, të cilin e ka parë Radio Evropa e Lirë, kërkohet, ndër të tjera, që dënimi maksimal që mund të shqiptohet nga Dhomat e Specializuara të jetë 15 vjet burgim dhe që personat e dënuar të mund të jenë subjekt i faljes presidenciale.
Projektligji iu dërgua Qeverisë për mendim më 25 shtator, pas mbledhjes së parë të Kryesisë së Kuvendit të legjislaturës së 11-të.
Nismën e PDK-së e ka mbështetur Aleanca, ndërsa LVV-ja ka thënë po e shqyrton fillimisht në aspektin juridik.
Nga Lidhja Demokratike e Kosovës kanë thënë se qëndrimi i kësaj partie do të bëhet i ditur pasi ta pranojë zyrtarisht tekstin e projektligjit.
Kryeparlamentarja Albulena Haxhiu tha se projektligjin e PDK-së e ka dërguar te një ekip ekspertësh, por se ende nuk mund të japë vlerësim për përmbajtjen e tij.
Ajo, megjithatë, kritikoi mungesën e konsultimeve gjatë hartimit të tij, duke thënë se do të ishte më e drejtë që projektligji të hartohej nga Komisioni për Legjislacion ose që paraprakisht të konsultoheshin ekipet mbrojtëse të katër ish-krerëve të UÇK-së dhe ekspertë të fushës.
Ndërkohë, Radio Evropa e Lirë i ka kërkuar Qeverisë të hënën të sqarojë se kur pritet t’ia përcjellë Kuvendit mendimin për projektligjin, por deri në publikimin e këtij lajmi nuk ka pranuar përgjigje.
Ndërkaq, kryetari i PDK-së, Bedri Hamza, tha të hënën se partia e tij është e hapur për të diskutuar edhe tema të tjera me LVV-në, nëse miratohet projektligji për ndryshimin dhe plotësimin e ligjit për Dhomat e Specializuara.
Hamza tha se për projektligjin kishte diskutuar edhe me kryeministrin Albin Kurti gjatë një takimi të dielën. Sipas tij, në takim ishte diskutuar edhe çështja e zgjedhjes së presidentit, por jo emrat e mundshëm.
“Nuk kemi shkuar për emrat, nuk i kemi folur, nëse kalohet ligji jemi të hapur edhe për tema tjera”, tha Hamza./ REL
