Një hetim i FBI-së amerikane ka zbardhur mënyrën se si funksiononte Rydox, një treg ilegal në internet ku, për vite me radhë, shiteshin të dhëna personale të vjedhura, kredenciale llogarish dhe mjete të përdorura për mashtrime online.

Sipas autoriteteve amerikane, pas platformës qëndronin vëllezërit nga Kosova, Ardit dhe Jetmir Kutleshi, të cilët dyshohet se kishin role të ndryshme në administrimin dhe mirëmbajtjen e saj.

Hetimi i FBI-së kishte nisur të paktën në vitin 2022, kur një burim i fshehtë i agjencisë hapi një llogari në Rydox dhe depozitoi 300 dollarë në kriptovaluta.

Më pas, burimi bleu rreth 40 paketa me të dhëna të vjedhura, ku përfshiheshin emra, adresa, datëlindje, numra të sigurimeve shoqërore dhe të dhëna të patentë-shoferëve.

Mes të dhënave të blera ishin edhe ato të një personi nga Pensilvania, të cilat, sipas dokumenteve gjyqësore, ishin nxjerrë në shitje pa dijeninë apo autorizimin e tij.

Sipas dokumenteve të gjykatës amerikane, Rydox funksiononte të paktën që nga viti 2016. Platforma pranonte pagesa në kriptovaluta dhe ofronte një katalog me të dhëna të kartave bankare, fjalëkalime, kredenciale për llogari emaili dhe shërbime online, si dhe mjete për mashtrime dhe dërgimin e mesazheve të padëshiruara.

Një prej produkteve kryesore të ofruara në platformë ishin të ashtuquajturat “fullz” – paketa me të dhëna të plota identifikuese, të cilat mund të përdoreshin për mashtrime financiare dhe vjedhje identiteti.

Sipas aktakuzës amerikane, administrimi i Rydox ishte një aktivitet i organizuar.

Ardit Kutleshi merrej me kërkesat e përdoruesve, llogaritë administrative, si dhe pagesat për domenet dhe serverët. Ndërkohë, Jetmir Kutleshi ndihmonte në përditësimin e uebsajtit dhe infrastrukturës së platformës.

Rydox gjeneronte të ardhura si nga shitësit, të cilët paguanin një tarifë për t’u regjistruar në platformë, ashtu edhe nga vetë transaksionet.

Sipas dokumenteve gjyqësore, shitësit merrnin 60 për qind të shumës së shitjes, ndërsa 40 për qind i mbante platforma.

FBI-ja përdori edhe gjurmimin e transaksioneve në kriptovaluta për të lidhur aktivitetin e Rydox me vëllezërit Kutleshi.

Sipas hetuesve, një pjesë e të ardhurave të platformës kalonte në kuleta digjitale të kontrolluara prej tyre. Paratë përdoreshin gjithashtu për pagesat e serverëve dhe shërbimeve të tjera të nevojshme për funksionimin e tregut.

Blerjet e fshehta të FBI-së vazhduan edhe gjatë vitit 2024. Në një rast, agjentët blenë të dhëna identifikuese të një viktime dhe kredenciale për një llogari me pagesë që i përkiste një viktime tjetër.

Më pas, hetuesit kontaktuan disa prej personave të prekur për të konfirmuar se të dhënat e tyre ishin përdorur dhe shitur pa autorizim.

Më 12 dhjetor 2024, Ardit dhe Jetmir Kutleshi u arrestuan në Kosovë me kërkesë të Shteteve të Bashkuara.

Në Shqipëri u arrestua gjithashtu shtetasi kosovar Shpend Sokoli, të cilin autoritetet amerikane e identifikuan si një tjetër administrator të Rydox.

Jetmir Kutleshi pranoi fajësinë për një nga akuzat dhe u dënua në vitin 2025.

Ndërsa Ardit Kutleshi pranoi fajësinë në shtator 2026 për komplot për pastrim parash dhe vjedhje të rëndë identiteti. Sipas informacionit të dhënë në dokumentet e çështjes, dënimi i tij pritet të caktohet në fillim të vitit 2027.

Operacioni i autoriteteve amerikane i dha fund edhe infrastrukturës së Rydox. Domeni i platformës u sekuestrua, ndërsa serverët u morën nën kontroll nga FBI-ja dhe autoritetet e Malajzisë.