FIFA dhe UEFA përplasen sërish, akuza nga të dyja palët para zgjedhjeve

Një tjetër përplasje mes FIFA-s dhe UEFA-s është zbuluar, këtë herë për një projekt financiar të braktisur dhe për zgjedhjet e ardhshme për presidencën e futbollit botëror.

Në qendër të konfliktit është projekti i FIFA-s që do të kishte në menaxhim të drejta komerciale të Kupës së Botës.

Projekti nuk u realizua dhe u braktis në korrik, pas kundërshtimeve të disa konfederatave, mes tyre edhe UEFA-s. Por debati tashmë ka kaluar në planin ligjor dhe institucional, duke u lidhur edhe me garën për presidencën e FIFA-s.

FIFA ka akuzuar UEFA-n se po zhvillon një “fushatë dezinformimi” dhe se veprimet e saj synojnë të ndikojnë në procesin e rizgjedhjes së presidentit Gianni Infantino.

Nga ana tjetër, UEFA ka ndërmarrë hapa ligjorë në Shtetet e Bashkuara. Organizata europiane i është drejtuar një gjykate federale amerikane, duke kërkuar dokumente dhe dëshmi që synon t’i përdorë në një procedurë të mundshme penale në Zvicër ndaj Infantinos.

Sipas UEFA-s, projekti është përgatitur në mënyrë të fshehtë dhe me përfshirjen e një grupi të kufizuar këshilltarësh dhe investitorësh. UEFA pretendon se strukturat drejtuese nuk janë konsultuar në masën e nevojshme gjatë këtij procesi.

UEFA ka ngritur pikëpyetje mbi këtë vlerësim dhe pretendon se shifra nuk pasqyronte vlerën reale të të drejtave komerciale të FIFA-s.

FIFA, megjithatë, e kundërshton këtë interpretim. Në dokumentet e dorëzuara në gjykatën federale në Shtetet e Bashkuara, organizata argumenton se UEFA po ngatërron vlerën e aksioneve me vlerën e përgjithshme të kompanisë.

Infantino pritet të kërkojë një mandat të ri në zgjedhjet që janë planifikuar për muajin mars. Pikërisht kjo afërsi mes debatit financiar dhe procesit zgjedhor ka shtuar përplasjen mes FIFA-s dhe UEFA-s.

FIFA pretendon se veprimet ligjore të UEFA-s nuk lidhen vetëm me projektin e braktisur, por mund të ndikojnë edhe në garën për rizgjedhjen e Infantinos.