Presidenti i Partisë së Lirisë, Ilir Meta, u ka bërë thirrje forcave politike shqiptare në Luginën e Preshevës që të bashkohen në një listë të përbashkët në zgjedhjet e 25 tetorit në Serbi.

Përmes një postimi, Meta e cilëson procesin zgjedhor si një mundësi për forcimin e përfaqësimit politik të shqiptarëve dhe për një zë më të fuqishëm në Kuvendin e Serbisë.

Meta argumenton se dallimet politike duhet t’i lënë vend interesit të përbashkët dhe mbrojtjes së të drejtave të shqiptarëve në Luginën e Preshevës dhe në Serbi.

Sipas tij, bashkimi në një listë do të mundësonte që vota e shqiptarëve të përdorej në funksion të një përfaqësimi më domethënës dhe të mbrojtjes së të drejtave të tyre.

Postimi i plotë:

Zgjedhjet e 25 tetorit në Serbi janë një mundësi për fuqizimin e të gjithë faktorit politik shqiptar përmes bashkimit, për ta bërë çdo votë, të dobishme në mbrojtje të të drejtave të shqiptarëve në Luginën e Preshevës dhe Serbi.

Dallimet politike duhet t’i lënë vend interesit të përbashkët kombëtar dhe domosdoshmërisë për një përfaqësim shumë më domethënës dhe zë më të fuqishëm në Kuvendin e Serbisë.

Kjo është e vetmja rrugë për t'u dhënë shqiptarëve përfaqësimin e duhur dhe që të drejtat e tyre të mbrohen dhe respektohen!