Bashkimi Evropian po përgatitet për një dimër të vështirë sa i përket kostove të energjisë, me Brukselin që pret çmime të larta, pavarësisht se nuk parashikon probleme me sigurinë e furnizimit.
Komisioneri Evropian për Energjinë, Dan Jorgensen, gjatë një konference për shtyp në margjinat e Këshillit informal të Energjisë në Dublin, deklaroi se furnizimi me energji nuk pritet të jetë problem, por shqetësimi kryesor mbeten çmimet.
“Nuk ka dyshim se po i afrohemi një dimri sfidues. Ne nuk parashikojmë probleme me sigurinë e furnizimit për energjinë, por parashikojmë çmime shumë të larta”, u shpreh Jorgensen.
Sipas tij, edhe nëse furnizimi është i garantuar, çmimet e larta mund të krijojnë vështirësi për qytetarët që nuk kanë mundësi të përballojnë kostot e energjisë dhe karburanteve.
Për këtë arsye, Komisioni Evropian po shqyrton masa të reja për të përmirësuar përballueshmërinë e energjisë. Jorgensen tha se po vlerësohen mundësi për t’i bërë rregullat më fleksibël dhe më efikase, me synim lehtësimin e kostove për konsumatorët.
Në fokus janë edhe masat për të mbështetur disponueshmërinë dhe përballueshmërinë e karburanteve të transportit.
“Kjo është një shqetësim i madh për shumë qytetarë dhe ka një ndikim në një pjesë të madhe të ekonomisë sonë”, deklaroi Komisioneri Evropian për Energjinë./Versus.al
