Në Prishtinë po vijon edhe sonte, të martën, protesta kundër aktgjykimit të Dhomave të Specializuara ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.

Kjo është nata e 14-të radhazi që qytetarët janë mbledhur në sheshin “Skënderbeu”, në kundërshtim të vendimit të shpallur më 16 shtator nga Gjykata Speciale në Hagë.

Protestuesit kërkojnë reagim dhe ndërmarrjen e veprimeve konkrete nga institucionet e Kosovës lidhur me aktgjykimin, ndërsa organizatorët kanë paralajmëruar se tubimet do të vijojnë edhe në ditët në vazhdim.

Gjatë protestës janë parë qytetarë me pankarta dhe mesazhe në mbështetje të ish-krerëve të UÇK-së. Kërkesa kryesore e protestuesve mbetet kundërshtimi i aktgjykimit dhe një reagim më i drejtpërdrejtë institucional ndaj tij.

Thaçi, Veseli, Krasniqi dhe Selimi u dënuan më 16 shtator me gjithsej 81 vjet burgim. Aktgjykimi nuk është i formës së prerë dhe mund të apelohet, ndërsa ekipet e mbrojtjes kanë paralajmëruar se do ta ankimojnë vendimin.

Ndërkohë, Partia Demokratike e Kosovës ka kërkuar ndryshime në ligjin për Dhomat e Specializuara, duke e lidhur këtë kërkesë me zhvillimet e fundit në Hagë dhe me nevojën, sipas saj, për mbështetje më të madhe institucionale ndaj personave të akuzuar dhe të dënuar.

Protestat në Prishtinë kanë vijuar për disa net me radhë, ndërsa organizatorët kanë bërë të ditur se tubimet do të vazhdojnë deri në ndërmarrjen e hapave konkretë nga institucionet e Kosovës.