Takimi i parë i ambasadorit të SHBA-së, Eric Wendt i shkon Ramës në zyrë

Ambasadori i SHBA-ve në Tiranë, Eric Wendt, ka shkuar në Kryeministri paraditen e sotme, ku ka zhvilluar një takim me Kryeministrin Edi Rama.

Ky është takimi i parë i kryediplomatit amerikan në Tiranë pak ditë pasi nisi zyrtarisht detyrën si ambasador i SHBA-së në Shqipëri.

Ndërkohë kryeministri Edi Rama ka reaguar përmes një postimi të shkurtër në rrjetet sociale, pas takimit me ambasadorin amerikan, Eric Wendt.

“Takimi i mirëseardhjes së Ambasadorit të ri amerikan në Tiranë, Eric Wendt”, shkruan Rama në rrjetet sociale, shoqëruar me një foto nga takimi.

Eric Wendt nisi zyrtarisht detyrën si ambasador i Shteteve të Bashkuara të Amerikës në Shqipëri, më 26 shtator, pasi i dorëzoi letrat kredenciale Presidentit Bajram Begaj.

Ndërkohë, më 2 tetor, Ambasada e SHBA-së në Tiranë pritet të organizojë një ceremoni prezantuese për ambasadorin e ri, në një hotel në qendër të kryeqytetit.