Janë publikuar pamje të reja që tregojnë Presley Gerber, djalin e modeles Cindy Crawford dhe biznesmenit Rande Gerber, në orët e fundit para vdekjes së tij në moshën 27-vjeçare.
Në video, e siguruar nga mediat amerikane, Presley shihet duke filmuar veten dhe ambientet e qendrës së rehabilitimit Resolutions Living në Santa Monica, Kaliforni. Pamjet janë regjistruar të shtunën në mbrëmje, një natë para se ai të gjendej pa shenja jete.
Në fillim të videos, Gerber shfaqet me një bluzë të bardhë pa mëngë, syze dhe një varëse argjendi. Më pas, ai drejton kamerën drejt dhomës ku qëndronte, ku shihen disa krevate dhe sende personale.
Modeli vazhdon të filmojë ambientet e qendrës dhe më pas del në ballkon, nga ku shihet pamja e qytetit dhe zonave përreth. Qendra ku ai qëndronte ofronte gjithashtu hapësira rekreative, palestër dhe ambiente të tjera për banorët.
Presley ishte futur në këtë qendër gjatë fundjavës, ndërsa të nesërmen, më 20 shtator, u gjet pa shenja jete. Shërbimet emergjente u thirrën për një rast të raportuar si arrest kardiak dhe mbidozë, por shkaku zyrtar i vdekjes ende nuk është përcaktuar. Zyra e Mjekësisë Ligjore të Los Angelesit ka bërë të ditur se hetimi vazhdon dhe se nevojiten ekzaminime të tjera.
Gerber kishte folur publikisht në të kaluarën për vështirësitë me varësinë dhe trajtimin e tij. Në një prej postimeve të fundit në rrjetet sociale, ai kishte ndarë me ndjekësit një përvojë gjatë trajtimit për varësinë, duke shkruar se po përpiqej të përballej me gjërat nga të cilat kishte ikur për një kohë të gjatë.
Në muajt para vdekjes, ai kishte folur gjithashtu publikisht për shëndetin mendor dhe përvojat e tij me varësinë. Në një event në Malibu në qershor, ku mori pjesë së bashku me prindërit e tij, Presley kishte diskutuar për rrugëtimin e tij dhe rëndësinë e të qenit i sinqertë me veten.
Familja Gerber-Crawford ka kërkuar privatësi pas humbjes së tij. Ndërkohë, autoritetet vijojnë hetimet për rrethanat e vdekjes, ndërsa rezultatet përfundimtare të ekzaminimeve mjeko-ligjore pritet të përcaktojnë shkakun dhe mënyrën e vdekjes.
