Një 28-vjeçar i shpallur në kërkim është arrestuar në Tiranë, pasi gjatë kontrollit në banesën e tij janë gjetur dy pistoleta, municion luftarak dhe një sasi prej 363 gramësh lëndë e dyshuar narkotike kokainë.
Në pranga ka rënë shtetasi me inicialet O. F., banues në Tiranë. Sipas policisë, kokaina ishte e ndarë në 235 doza, çka ka ngritur dyshimet se lënda narkotike ishte përgatitur për shitje.
Në banesë është gjetur gjithashtu edhe një peshore elektronike.
Përveç lëndës narkotike, gjatë kontrollit janë sekuestruar edhe dy armë zjarri, pistoleta, si dhe municion luftarak, të cilat 28-vjeçari dyshohet se i posedonte pa leje.
I riu ishte shpallur më herët në kërkim, pasi Gjykata e Tiranës i kishte caktuar masën e sigurisë “Arrest në burg”, në kuadër të operacionit të koduar “Shkolla të pastra”. Ai dyshohet për veprën penale “Prodhimi dhe shitja e narkotikëve”.
Hetimet vijojnë për të dokumentuar tërësisht përfshirjen e 28-vjeçarit në veprimtari të dyshuara kriminale, ndërsa policia po punon edhe për identifikimin dhe kapjen e personave të tjerë të shpallur në kërkim në kuadër të të njëjtit operacion.
