Ambasadori amerikan Wendt takohet me ministrin Hoxha/ Zbardhet fokusi i diskutimeve

Ambasadorin e ri të SHBA-së, Eric Wendt, u prit këtë të mërkurë nga ministri për Europën dhe Punët e Jashtme, Ferit Hoxha.

Siç bëhet me dije përmes një njoftimi për shtyp, fokusi i diskutimeve ishte forcimi i partneritetit strategjik, zgjerimi i mundësive në ekonomi dhe investimet.

“Shtetet e Bashkuara mbeten një nga partnerët strategjikë më të afërt dhe më të çmuar të Shqipërisë. Marrëdhënia jonë mbështetet në vlera të përbashkëta demokratike, në një partneritet të fortë të sigurisë brenda NATO-s dhe në një miqësi të kahershme mes popujve tanë. Gjurmët e Shteteve të Bashkuara në momente kyçe dhe përcaktuese të historisë së Shqipërisë janë të pashlyeshme dhe mbeten një themel i fuqishëm për partneritetin tonë strategjik, të fortë dhe gjithnjë e më të thelluar.

Pres të punojmë ngushtë së bashku për të thelluar më tej marrëdhëniet tona dypalëshe, përfshirë për të zgjeruar mundësitë ekonomike dhe të investimeve, për të forcuar bashkëpunimin për sigurinë dhe stabilitetin rajonal, si dhe për t’iu përgjigjur sfidave globale që kërkojnë koordinim të ngushtë mes aleatëve.

Për Shqipërinë, anëtarësimi në Bashkimin Europian, si përparësia jonë kryesore kombëtare, dhe një partneritet i fortë e i qëndrueshëm transatlantik janë dy anë të së njëjtës medalje. Mbetemi plotësisht të angazhuar për forcimin e mëtejshëm të partneritetit tonë strategjik me Shtetet e Bashkuara dhe të lidhjeve tona transatlantike në vitet që vijnë”,-mësohet të ketë thënë Hoxha.

Ndërsa i uroi ambasadorit Wendt suksese në misionin e tij në Shqipëri, Hoxha theksoi se pret një bashkëpunim të afërt, produktiv dhe të qëndrueshëm./CNA