UNICEF: Miliona fëmijë në Amerikën Latine në rrezik nga El Nino

Fondi i Kombeve të Bashkuara për Fëmijë, UNICEF ka paralajmëruar se miliona fëmijë dhe adoleshentë në Amerikën Latine janë të kërcënuar nga thatësirat dhe përmbytjet e shkaktuara nga një fenomen i pazakontë El Nino.

Ky fenomen natyror, i cili ndodhi në qershor, është në rrugën e duhur për t’u bërë më intensivi i regjistruar ndonjëherë dhe i shtohet ndryshimeve klimatike të shkaktuara nga aktivitetet njerëzore, duke amplifikuar ngjarjet ekstreme të motit. Kulmi i tij pritet midis tetorit dhe dhjetorit.

Një raport nga UNICEF vlerëson se 25.8 milionë fëmijë dhe adoleshentë në Amerikën Latine “përballen me rreziqe në rritje” për shkak të thatësirës ose reshjeve në rritje që lidhen me El Ninon.

“Pasojat e El Nino-s, gjithnjë e më të dukshme dhe të rënda, kërcënojnë të shtyjnë edhe më shumë fëmijë dhe adoleshentë në situata në të cilat ata do të jenë më të prekshëm dhe të thellojnë pabarazitë ekzistuese”, tha Roberto Benes, drejtor i UNICEF-it për Amerikën Latine dhe Karaibet.

Në Guatemalë, El Salvador, Honduras dhe Nikaragua, thatësira do të ndikojë në prodhimin bujqësor, duke shkaktuar pasiguri ushqimore dhe një rrezik të kequshqyerjes tek fëmijët, të cilët tashmë përballen me vështirësi në aksesin ndaj ushqimit dhe ujit të pijshëm.

Ndërkohë, në bregdetin e Paqësorit të Meksikës dhe Amerikës së Jugut, rritja e reshjeve do të shkaktojë një rrezik në rritje të përmbytjeve dhe dëmtimeve të shkollave dhe infrastrukturës shëndetësore, thekson organizata.

Zyrtari i UNICEF-it bëri thirrje për forcimin e gatishmërisë, mbrojtjen e shërbimeve thelbësore dhe sigurimin që fëmijët të marrin mbështetjen që u nevojitet.

UNICEF tha se kishte kërkuar 53.8 milionë dollarë për t’iu përgjigjur emergjencave të lidhura me El Nino në Amerikën Latine, por kishte marrë vetëm gjysmën e kësaj shume deri më 30 qershor.