Takimi Rama-Wendt/ Ambasada amerikane zbardh detaje për çështjet e diskutuara

Ambasada e Shteteve të Bashkuara të Amerikës në Tiranë ka bërë një reagim lidhur me takimin e kryeministrit Edi Rama dhe ambasadorit amerikan Eric Wendt. Ambasada thekson se një partneritet i fortë mes dy kombesh matet nga ajo se çfarë arrijnë së bashku.

Ndër të tjera ka zbardhur detaje për çështjet e diskutuara mes kryeministrit dhe ambasadorit, ku përfshihen thellimi i bashkëpunimit në fushën e mbrojtjes, zgjerimi i tregtisë dhe investimeve si dhe forcimi i luftës kundër krimit të organizuar.

“Një partneritet i fortë matet nga ajo që dy kombe arrijnë së bashku.  Ambasadori Eric Wendt u takua sot me Kryeministrin Edi Rama për të diskutuar thellimin e bashkëpunimit në fushën e mbrojtjes, zgjerimin e tregtisë dhe investimeve, si dhe forcimin e luftës kundër krimit të organizuar”, thuhet në postimin e ambasadës.

Më herët, Rama përmes një reagimi në rrjetet sociale i uroi mirëseardhjen ambasadorit Wendt. Më 26 shtator, Wendt ia dorëzoi letrat kredenciale presidentit Bajram Begaj duke nisur kështu zyrtarisht detyrën e tij në Shqipëri.

Ndërkohë, ditën e djeshme, Ambasada Amerikane ndau pamje teksa trupat e Marinsave të Shteteve të Bashkuara ngrenë flamurin amerikan. Wendt u shpreh se forcimi i aleancës SHBA-Shqipëri është një hap për një të ardhme më të sigurtë dhe më të begatë për të dyja vendet. /CNA