Kreu i Grupit Parlamentar të PD-së, Gazment Bardhi ka reaguar ndaj deklaratave të kryeministrit Edi Rama për ndryshimet në Kodin e Procedurës Penale, duke theksuar se po bëhet një ligj për hallet e vjetra të tij.
Në një reagim në rrjete sociale, Bardhi shkruan se Rama, gjatë qeverisjes së tij, e ka përdorur burgimin si një mjet, duke përmendur arrestime për ndërtimet pa leje, energjinë elektrike, punën në të zezë etj.
Bardhi sjell si shembull rastin e Qamil Zelës, i cili u arrestua në kuadër të operacionit për energjinë dhe më pas humbi jetën në paraburgim. Ai i referohet gjithashtu një raporti të Këshillit të Europës të vitit 2014, i cili ngrinte shqetësimin për përdorimin e tepruar të paraburgimit në Shqipëri.
Sipas Bardhit, Rama e riktheu në vëmendje çështjen e paraburgimit pas arrestimit të Erion Veliajt në shkurt 2025, kur kryeministri foli publikisht kundër “burgosjes pa gjyq”.
Duke lidhur ndryshimet e propozuara me zhvillimet e fundit politike dhe hetimet e SPAK-ut, Bardhi deklaron se ndryshimet synojnë t’i shërbejnë interesave të kryeministrit.
Reagimi:
Një ligj i ri për hallet e vjetra të Ramës!
Edi Ramës nuk i intereson se kush rri në paraburgim me të drejtë dhe kush jo. Po t’i interesonte vërtet, nuk do ta kishte shpallur dhe ndjekur “BURGUN” si rrugën e shkurtër të zgjidhjes së çdo problemi social në Shqipëri, që ditën e parë të ardhjes në pushtet. Burg për ndërtimet pa leje. Burg për energjinë. Burg për punën në të zezë. Burg gjatë COVID-it. Sa herë ai dështonte të mbante një premtim elektoral, përgjigjja politike ishte e njëjta: më shumë penalizim, më shumë burg.
Në tetor 2014, gjatë operacionit për energjinë, u arrestuan mbi 1 mijë persona vetëm në muajt e parë. Një politikë që pati edhe histori tragjike. Qamil Zela, 52 vjeç, baba i tre fëmijëve, qëndroi dy muaj në paraburgim për një borxh prej 35 mijë lekësh të vjetra dhe, më 28 dhjetor 2014, u vetëvar në qeli.
Prandaj Edi Rama nuk mund ta sjellë sot Këshillin e Europës sikur sapo ka zbuluar se Shqipëria ka problem me paraburgimin. Këshilli i Europës e kishte thënë këtë që në muajt e parë të qeverisjes së tij. Më 16 janar 2014, Këshilli i Europës paralajmëroi për “mbështetjen e tepruar te paraburgimi” dhe rekomandoi që kjo masë të përdorej vetëm si zgjidhje e fundit, duke u dhënë përparësi alternativave. Raporti i Këshillit të Europës konstatoi se, nga tetori 2013 deri në shkurt 2014, numri i të paraburgosurve ishte dyfishuar, duke arritur rreth 2,300 persona, ose afërsisht 40% të të gjithë popullsisë së burgjeve.
Pra, Edi Rama e dinte. Paralajmërimi europian ishte bërë dhe shkaktari ishte identifikuar: politika e qeverisë.
Atëherë, kur iu kujtua Edi Ramës se liria duhet të jetë rregulli dhe burgu përjashtimi?
Sigurisht, jo në vitin 2014, kur Këshilli i Europës ngrinte alarmin. Jo kur, sapo ai erdhi në pushtet, paraburgimet u dyfishuan. Dhe jo kur Qamil Zela u vetëvar në paraburgim për energjinë elektrike.
Edi Rama u kujtua se kishte shkaktuar këtë problem në shkurt 2025, pas arrestimit të Erion Veliajt.
Më 12 shkurt 2025, dy ditë pas arrestimit, Edi Rama foli për “burgosje pa gjyq” të Veliajt dhe tha se gjykimi mund të vazhdonte në gjendje të lirë. Vetëm atëherë zbuloi edhe “zonën e lirisë” të Këshillit të Europës.
Jo se i dhimbset Veliaj. Edi Rama po punon për veten. Ergys Agasi ka shumë për të thënë. Belinda Balluku ka shumë për të thënë. Besoj të gjithëve u kujtohet deklarata publike se SPAK-u nuk ia merrte dot telefonin Edi Ramës.
Ndryshimet e sotme shpjegojnë gjithçka.
Deri tani Edi Rama ka bërë ligje me porosi për të tjerët. Sot, po qep një ligj sipas masës së vet.
