Një zjarr ka rënë mesditën e sotme në zonën e Fllakës, në Durrës, ku flakët kanë përfshirë një pikë grumbullimi skrapi.
Sipas informacioneve paraprake, zjarri është përhapur me shpejtësi edhe në bimësinë përreth dhe përgjatë kanaleve të zonës, duke zgjeruar sipërfaqen e prekur.
Përhapja e flakëve ka shkaktuar shtëllunga të dendura tymi, të cilat janë ngritur mbi zonë dhe janë të dukshme në distancë, përfshirë edhe nga autostrada Durrës-Tiranë.
Në vendngjarje kanë mbërritur shërbimet zjarrfikëse nga Durrësi dhe Shijaku. Ekipet po punojnë për izolimin e vatrave dhe parandalimin e përhapjes së mëtejshme të zjarrit në zonën përreth.
Ndërhyrja vijon, ndërsa deri më tani nuk ka një bilanc të konfirmuar lidhur me dëmet e shkaktuara. Po ashtu, nuk është bërë e ditur nëse nga ngjarja ka persona të lënduar.
Ende nuk dihen rrethanat në të cilat ka nisur zjarri. Pritet që pas vënies nën kontroll të flakëve dhe verifikimeve në terren të ketë më shumë informacion mbi shkakun dhe përmasat e dëmeve.
Ndërkohë, pritet që autoritetet të japin detaje të mëtejshme lidhur me ngjarjen dhe situatën në zonën e prekur.
