Një fluturim i kompanisë Flydubai, me destinacion Tel Avivin, është devijuar dhe është ulur në Tabuk të Arabisë Saudite pas një emergjence të regjistruar gjatë fluturimit. Të gjithë pasagjerët dhe anëtarët e ekuipazhit raportohet se janë shëndoshë e mirë.
Fox news shkruan se, fluturimi FZ1073 ishte nisur nga Dubai drejt aeroportit Ben Gurion, pranë Tel Avivit, me më shumë se 100 pasagjerë izraelitë në bord. Gjatë udhëtimit, avioni ndryshoi drejtim dhe u ul në Arabinë Saudite.
Sipas një zyrtari rajonal të cituar nga Associated Press, një grindje ka shpërthyer në kabinën e pilotit, ku dyshohet se janë përfshirë dy pilotët. Mediat izraelite kanë raportuar gjithashtu se një mosmarrëveshje mes tyre mund të ketë shkaktuar emergjencën.
Ekuipazhi është marrë në pyetje si pjesë e hetimit, ndërsa autoritetet nuk kanë bërë të ditur nëse ndonjë prej tyre është ndaluar.
Incidenti shkaktoi alarm në Izrael, pasi në minutat e para autoritetet dyshuan për mundësinë e një rrëmbimi të avionit. Forcat Ajrore izraelite ngritën avionë luftarakë për të monitoruar situatën.
Të dhënat e Flightradar24 tregojnë se avioni aktivizoi kodin e emergjencës 7700, ndërsa për pak kohë transmetoi edhe kodin 7500, i cili përdoret për të sinjalizuar ndërhyrje të paligjshme në një avion, përfshirë rrëmbimin.
Avioni raportohet se pësoi një zbritje të menjëhershme prej rreth 14 mijë metrash në më pak se 30 sekonda. Ekspertët e aviacionit kanë thënë se një zbritje e tillë mund të jetë në përputhje me një procedurë emergjente, për shembull në rast të humbjes së presionit në kabinë.
Pasagjerët kanë përshkruar momente paniku gjatë zbritjes, duke raportuar britma në pjesën e përparme të avionit, hapjen e disa ndarjeve të bagazheve dhe ndërprerje të energjisë elektrike.
Pas uljes në Tabuk, avioni u rrethua nga forca të shumta të sigurisë saudite. Autoritetet izraelite deklaruan më vonë se situata ishte nën kontroll dhe se po punohej për rikthimin e pasagjerëve në Izrael.
Flydubai konfirmoi se fluturimi FZ1073 kishte përjetuar një incident gjatë rrugës drejt Aeroportit Ben Gurion dhe ishte ulur në mënyrë të sigurt në Tabuk.
“Ekipet tona po punojnë ngushtë me autoritetet përkatëse”, deklaroi kompania, duke shtuar se informacione të tjera do të bëhen publike pasi të konfirmohen.
Shkaqet e sakta të incidentit mbeten ende të paqarta, ndërsa hetimet vijojnë për të përcaktuar se çfarë ndodhi në kabinën e pilotit dhe arsyen e devijimit të avionit./Versus.al
View this post on Instagram
