Moderatorja dhe deputetja Ori Nebijaj ka reaguar lidhur me videot me përmbajtje intime të personazheve të njohur që janë publikuar dhe po shpërndahen në rrjetet sociale.
Përmes një reagimi, Nebijaj e ka dënuar publikimin e këtyre materialeve, duke vënë theksin te përgjegjësia e personave që i shpërndajnë ato.
Ajo e ka cilësuar situatën si një kalim “nga skandali në spektakël”, duke kritikuar mënyrën se si materiale private kthehen në përmbajtje që qarkullon masivisht në rrjet.
Nebijaj ka kërkuar që ndaj personave që publikojnë apo shpërndajnë video të tilla të merren masa ligjore, duke theksuar se shpërndarja e materialeve intime pa pëlqimin e personit të përfshirë nuk duhet të trajtohet si argëtim.
“Burg për këdo që shpërndan…”, është shprehur ajo në reagimin e saj, duke e zhvendosur vëmendjen te përgjegjësia e atyre që kontribuojnë në përhapjen e materialeve private.
Reagimi vjen në një kohë kur në rrjetet sociale po qarkullojnë materiale intime që pretendohet se u përkasin personazheve publike, duke nxitur debate mbi privatësinë, abuzimin me përmbajtjen personale dhe përgjegjësinë e përdoruesve në internet.