Barcelona ka marrë masa pas shqetësimit të krijuar rreth gjendjes fizike të Raphinhas, i cili ka lënë grumbullimin e Brazilit pas ndeshjes miqësore ndaj Australisë.

Sulmuesi dhe kapiteni i Barcelonës realizoi një nga golat e Brazilit nga pika e bardhë, por gjatë takimit ndjeu shqetësime muskulore dhe kërkoi të zëvendësohej si masë parandaluese. Që në komunikimet e para me klubin katalanas, nuk është raportuar për një dëmtim serioz.

Për shkak të ngarkesës së madhe të kalendarit ndërkombëtar dhe lodhjes së shkaktuar nga udhëtimet, Barcelona kërkoi rikthimin e menjëhershëm të futbollistit në Spanjë, me synimin për të shmangur çdo komplikacion të mundshëm fizik.

Raphinha ka nisur tashmë rrugëtimin drejt Barcelonës, në një udhëtim transoqeanik që zgjat pothuajse një ditë. Sipas planit të klubit, braziliani do të pushojë të enjten, ndërsa të premten do të paraqitet në Ciutat Esportiva Joan Gamper, ku do t’i nënshtrohet kontrolleve mjekësore.

Pas ekzaminimeve, Raphinha pritet të takohet edhe me stafin teknik të drejtuar nga Hansi Flick.

Në ambientet e Barcelonës mbizotëron qetësia sa i përket mundësisë që sulmuesi të jetë i gatshëm për ndeshjen e ardhshme të kampionatit ndaj Getafes. Megjithatë, drejtuesit nuk duan të marrin asnjë rrezik me kapitenin, sidomos duke pasur parasysh kalendarin e ngjeshur që e pret skuadrën.

Barcelona do të përballet së shpejti me transfertat ndaj Galatasaray-t dhe PSG-së, përpara sfidës së shumëpritur El Clásico. Për këtë arsye, objektivi kryesor i klubit është rikuperimi i plotë i Raphinhas përpara rikthimit të tij në fushë.