“Plas” te Portugalia, Ronaldo largohet nga stërvitja. Trajneri: Këtu vendos unë...

Jorge Jesus ka mohuar se mes tij dhe Cristiano Ronaldo ka pasur një përplasje pas ndeshjes ndaj Norvegjisë.

Trajneri i Portugalisë shpjegoi se Ronaldo ishte informuar paraprakisht se nuk do të luante në dy ndeshjet e radhës.

Gjatë sfidës me Norvegjinë, Jesus vendosi ta nxirrte për nxehje për 20 ose 30 minuta, por më pas ndryshoi vendim dhe nuk e aktivizoi. Sipas tij, çdo lojtar do të ishte i pakënaqur në një situatë të tillë, veçanërisht Ronaldo.

Jesus theksoi se vendimi për aktivizimin e lojtarëve i takon vetëm trajnerit dhe se askush nuk mund ta ndryshojë mendimin e tij.

Pas situatës u zhvillua edhe një takim mes Ronaldos, Jesusit dhe presidentit të Federatës Portugeze, por trajneri tha se çështja ishte zgjidhur pas darkës.

"Nuk është se kam ndonjë problem të përgjigjem, por fokusi është tërësisht te Danimarka. Ndihem sikur jemi këtu për të luajtur një miqësore... Nuk pati asnjë incident me Ronaldon. E kam shpjeguar tashmë pse lindi kjo situatë. Do ta shpjegoj përsëri. Nuk kam problem t'i adresoj këto çështje. Kam pasur shumë gjatë gjithë karrierës sime. Por tani doni ta bëni një incident...

I thashë Ronaldos që nuk do të luante këto dy ndeshje. Gjatë ndeshjes, mendova se mund të kisha nevojë për të, kështu që e bëra të ngrohej. Dhe pastaj nuk e lashë të hynte. Çdo lojtar që rri aty duke u ngrohur për 20 ose 30 minuta dhe pastaj nuk hyn në fushë nuk është i lumtur. Edhe më shumë Ronaldo.  Ky është rregulli. Të drejtat janë të barabarta, dhe si trajner, vendosa që ai të mos hynte në fushë.

Unë jam trajneri dhe kam vendosur të mos e aktivizoj. Nëse më duhet për gjysmë ore, ai do të luajë gjysmë ore, përndryshe nuk do të luajë. Asnjë lojtar nuk do të më ndryshojë kurrë mendjen për këtë, as ai, askush tjetër në futboll, madje as presidenti.

Më detyruan të flas me Ronaldon për një çështje që as nuk ishte problem. Ka aq shumë diskutime për këtë në Portugali saqë duhet të flasim, por nuk e kuptoj çfarë po ndodh. Nuk kishte asgjë për të folur”, tha Jesus.

Ndërkohë, pjesëmarrja e Ronaldo ndaj Danimarkës është në dyshim, pasi sulmuesi nuk mori pjesë as në stërvitjen e fundit.

Sfida e radhës për Portugalinë do të jetë ndaj Danimarkës në transfertë, e vlefshme për raundin e dytë të Ligës së Kombeve. Luzitanët kërkojnë suksesin e dytë radhazi, pas atij ndaj Norvegjisë.