Mposhtet ISIS në Irak, trupat amerikane dhe britanike tërhiqen pas më shumë se një dekade

Rrjeti terrorist i ISIS në Irak mund të konsiderohet i mposhtur, pasi forcat ndërkombëtare, të dominuara nga trupat amerikane dhe britanike, janë tërhequr të mërkurën nga vendi, pas një pranie prej më shumë se një dekade, duke ia kaluar përgjegjësinë për sigurinë forcave vendase.

Largimi i personelit ushtarak britanik nga Irbili, në Kurdistanin verior, u koordinua gjatë javëve të fundit me forcat amerikane, të cilat nisën kthimin në atdhe ditën e mërkurë.

Lëvizja vjen pas një marrëveshjeje mes Shteteve të Bashkuara dhe qeverisë irakene, të nënshkruar dy vjet më parë, për tërheqjen e trupave të huaja në fund të këtij muaji.

Forcat britanike dhe amerikane kanë qenë të pranishme në Irak që prej vitit 2014, si pjesë e koalicionit ndërkombëtar që u angazhua për të mposhtur ekstremistët e Shtetit Islamik. Largimi i tyre shënon përfundimin e misionit të koduar “Vendosmëria e Brendshme”.

Kryeministri iraken Ali al-Zaidi deklaroi se përfundimi i misionit të koalicionit shënon kalimin e Irakut në një fazë të re, në të cilën vendi merr tërësisht përsipër përgjegjësinë për sigurinë dhe stabilitetin e tij.

Për këtë arsye, vendi do të mbajë katër Ditët e Sovranitetit si pushim kombëtar, për të shënuar tërheqjen e trupave të huaja.

Qeveria irakene shpalli mposhtjen e ISIS në vitin 2017, por trupat e koalicionit qëndruan në vend për të parandaluar riorganizimin e grupit.

Një raport i fundit i OKB-së vlerëson se presioni antiterrorist i ushtruar nga forcat irakene të sigurisë e ka lënë grupin terrorist me qindra luftëtarë, të cilët nuk janë në gjendje të kryejnë sulme të sofistikuara.