Autoritetet turke kanë goditur një rrjet ndërkombëtar të dyshuar për mashtrim me investimet, ku dëmi i pretenduar arrin në rreth 3 miliardë dollarë.
Operacioni ka çuar në arrestimin e 201 personave, mes tyre 9 shtetas izraelitë, ndërsa 45 nga të arrestuarit janë shtetas të huaj nga 20 vende të ndryshme.
Çështja është hetuar nga strukturat turke kundër krimit financiar, shërbimi inteligjent MIT, policia dhe Interpol. Sipas të dhënave zyrtare të publikuara nga Anadolu Agency, hetimi është përqendruar te një rrjet kompanish dhe qendrash telefonike që dyshohet se mashtronin qytetarë të huaj përmes investimeve fiktive në Forex dhe kriptomonedha.
Si funksiononte skema
Sipas hetuesve, personat e përfshirë përdornin kompani dhe call center-a në Turqi për të kontaktuar viktima në vende të ndryshme të botës.
Viktimave u ofroheshin mundësi investimi me premtime për fitime të larta. Përmes platformave të investimit, atyre u shfaqeshin fitime fiktive, me qëllim që të bindeshin të depozitonin shuma gjithnjë e më të mëdha parash.
Problemet nisin kur klientët kërkonin të tërhiqnin paratë. Sipas akuzave, atyre u kërkoheshin pagesa të tjera nën justifikime të ndryshme, ndërsa fondet nuk u ktheheshin.
29 kompani dhe 44 call center-a nën hetim
Sipas raportimeve nga Turqia, rrjeti dyshohet se përdorte të paktën 29 kompani dhe 44 qendra telefonike, të paraqitura si biznese që operonin në sektorë të ligjshëm, përfshirë turizmin dhe konsulencën.
Paratë e përfituara nga skema dyshohet se transferoheshin më pas jashtë Turqisë, përmes llogarive bankare dhe portofoleve të kriptomonedhave.
Mediat turke flasin për “rrjet të Mossad-it”
Ministri turk i Drejtësisë, Akın Gürlek, e ka përshkruar operacionin si një goditje të rëndësishme ndaj një rrjeti ndërkombëtar mashtrimi të lidhur me Izraelin.
Ndërkohë, disa media turke kanë shkuar më tej, duke e cilësuar çështjen si një “rrjet mashtrimi të Mossad-it” dhe duke pretenduar për lidhje të drejtpërdrejta me shërbimin sekret izraelit.
Megjithatë, ky është një pretendim i mediave turke dhe nuk rezulton në deklaratat zyrtare të Ministrisë turke të Drejtësisë të cituara në raportimet për operacionin.
9 izraelitë të arrestuar, media raportojnë për 11
Sipas përditësimit zyrtar të raportuar nga Anadolu Agency, në mesin e të arrestuarve janë 9 shtetas izraelitë.
Mediat turke kanë raportuar edhe për arrestimin e dy shtetasve të tjerë izraelitë, duke e çuar numrin në 11, por ky informacion nuk është konfirmuar nga autoritetet turke në njoftimet zyrtare.
Në mesin e emrave të raportuar nga mediat turke është edhe Alona Notes Punkt, e cila dyshohet se ka pasur rol në menaxhimin financiar të rrjetit.
Emrat e tjerë të raportuar janë Anton Bihun, Jenny Kan, Hamza Guneyli, Ilker Hasson, Caroline Hasson, Sami Tovim, Yako Benhabib, Jacques Levy, Amit Yigal dhe Jacques Tovim.
Hetimet vijojnë për të përcaktuar strukturën e plotë të rrjetit, përmasat e mashtrimit dhe destinacionin e fondeve të transferuara jashtë Turqisë.
