Karamuço: Këshilli i Sigurisë Kombëtare do të mblidhet sërish për Vlora Hysenin

Profesori i kriminalistikës Ervin Karamuço deklaroi se Këshilli i Sigurisë Kombëtare pritet të mblidhet sërish për të diskutuar çështjen e ish-drejtoreshës së SHISH, Vlora Hyseni.

I ftuar në emisionin Now në Euronews Albania, Karamuço tha se mbledhja e Këshillit të Sigurisë Kombëtare dy herë brenda një muaji është një situatë e pazakontë dhe, sipas tij, tregon rëndësinë e çështjes.

“Derisa do të mblidhet dy herë brenda një muaji Këshilli i Sigurisë Kombëtare, gjë që nuk ka ndodhur asnjëherë, është një çështje shumë e nxehtë që kërkon analizë shteruese se çfarë ka ndodhur në të vërtetë”, u shpreh ai.

Karamuço foli edhe për pretendimet lidhur me largimin e Vlora Hysenit nga institucionet e Kosovës, duke kundërshtuar versionin se ajo është shkarkuar për “tradhti kombëtare”.

Sipas tij, dokumentacioni i përcjellë nga pala kosovare nuk e mbështet këtë pretendim. Karamuço tha se Hyseni fillimisht ka mbajtur një detyrë në fushën e marrëdhënieve me jashtë, më pas është komanduar dhe më vonë është larguar nga shërbimi, duke vijuar për një periudhë si inspektore përpara dorëheqjes.

Karamuço ngriti gjithashtu pretendimin se partnerët ndërkombëtarë mund të kenë pasur rol në zhvillimet që lidhen me arrestimin e Ergys Agasi nga SPAK.