Prodhuesi gjerman i automjeteve luksoze BMW ka prezantuar një plan ristrukturimi që përfshin shkurtimin e vendeve të punës, përdorimin më të gjerë të inteligjencës artificiale dhe lansimin e modeleve të reja, në përpjekje për të përmirësuar performancën dhe për të rikthyer besimin e investitorëve.
Kompania prezantoi të mërkurën një plan afatmesëm që synon uljen e kostove, thjeshtimin e strukturës menaxheriale dhe përshtatjen e strategjisë së produkteve me ndryshimet në tregjet kryesore.
Industria evropiane e automjeteve po përballet me kërkesë të dobët, konkurrencë në rritje nga prodhuesit kinezë dhe ndikimin e tarifave amerikane.
Për BMW-në, presioni është shtuar veçanërisht në Kinë, një prej tregjeve më të rëndësishme për prodhuesit gjermanë të automjeteve.
Në qershor, BMW-ja dha paralajmërimin e tretë për fitimet brenda pak më shumë se tre vitesh, të lidhur me performancën e dobët në tregun kinez.
Edhe
BMW-ja do t’i largojë 8 mijë punëtorë nën presionin nga rivalët kinezë
Në kuadër të planit të ri, BMW-ja ka nisur një program reduktimi të vendeve të punës që pritet të prekë rreth 8 mijë pozicione në Gjermani.
Kompania synon gjithashtu që deri në mesin e vitit 2027 të reduktojë me 20% numrin e divizioneve dhe pozicioneve menaxheriale që lidhen me to.
Inteligjenca artificiale do të ketë një rol të rëndësishëm në këtë proces.
Drejtori ekzekutiv i BMW-së, Milan Nedelkoviq, tha se këto masa synojnë t'i mundësojnë kompanisë të përballet me konkurrencën gjithnjë e më të fortë në industrinë e automjeteve.
Presioni financiar pasqyrohet edhe në objektivat e reja të kompanisë.
BMW synon që deri në vitin 2028 të arrijë një marzh fitimi prej 3% deri në 5% në aktivitetin e saj kryesor automobilistik.
Edhe
Firmat gjermane në vështirësi ndërsa Kina i sfidon në terrenin e tyre
Në fillim të viteve 2030, objektivi është një marzh prej 8% deri në 10%, krahasuar me vetëm 2.3% në rezultatet më të fundit.
Aksionet e kompanisë kanë rënë me më shumë se një të tretën gjatë vitit të fundit, duke zbritur në nivelin më të ulët në më shumë se gjashtë vjet.
Përveç reduktimeve, BMW-ja po ndryshon edhe strategjinë e produkteve.
Në Evropë, kompania planifikon të prezantojë nga viti 2028 një automjet elektrik të segmentit hyrës, duke synuar konsumatorët që kërkojnë modele më të përballueshme.
Strategjia për Kinën është e ndryshme. BMW-ja planifikon të rrisë lokalizimin e prodhimit dhe të mbështetet më shumë te partnerët vendas për teknologji, përfshirë sistemet e drejtimit autonom dhe softuerët e integruar.
Kompania po shqyrton gjithashtu mundësinë e eksportimit të automjeteve të prodhuara në Kinë drejt tregjeve të Azisë Juglindore.
Edhe
“Volkswagen” njofton shkurtimin e 100 mijë vendeve të punës deri në vitin 2030
Prodhuesit perëndimorë të automjeteve po përballen me një ndryshim të rëndësishëm në tregun kinez, ku konsumatorët po orientohen gjithnjë e më shumë drejt markave vendase.
Kjo ka prekur shitjet e kompanive evropiane, të cilat për vite me radhë e kanë konsideruar Kinën si një prej burimeve kryesore të rritjes dhe fitimeve.
