Donald Trump tha se kishte zhvilluar një bisedë të gjatë me kryeministrin izraelit Benjamin Netanyahu lidhur me ngjarjen e rëndë në fluturimin e Flydubai nga Dubai drejt Tel Avivit, të mërkurën.
Të lidhura
None found
Presidenti amerikan ngriti dyshime se bashkëpiloti që, sipas raportimeve, sulmoi me thikë kapitenin mund të ishte “terrorist” ose të kishte probleme. Ai gjithashtu vlerësoi rolin e një pasagjeri izraelit, i cili punon si hidraulik dhe ndihmoi në stabilizimin e avionit.
“Fola gjatë me Bibi Netanyahun rreth incidentit”, u tha Trump gazetarëve.
“Duket se bashkëpiloti ishte ndoshta terrorist, ose ndoshta kishte probleme, dhe e goditi me thikë kapitenin”, deklaroi presidenti.
Sipas Trump, kapiteni pësoi plagë të rënda, por arriti të hapte derën e kabinës dhe të kërkonte ndihmë.
“Piloti ishte në gjendje shumë të keqe dhe, nga sa kuptoj, vazhdon të jetë në gjendje të keqe”, tha ai. Trump shtoi se, megjithëse ishte i plagosur, kapiteni ruajti qetësinë dhe hapi derën e kabinës.
Ngjarja u regjistrua në fluturimin FZ1073 të Flydubai, që udhëtonte nga Dubai për në Tel Aviv dhe u detyrua të ulej emergjentisht në Tabuk të Arabisë Saudite. Bashkëpiloti është arrestuar, ndërsa autoritetet po hetojnë motivet e tij, të cilat ende nuk janë bërë të ditura.
