Dejan Jovanov-Deko, i dyshuar kryesor për vdekjen e 63 personave në diskotekën “Pulse”, do të lirohet nga paraburgimi të shtunën. Më 3 tetor, gjykata pritet të vendosë se cilat masa do të zbatohen për të garantuar pjesëmarrjen e tij në seancat gjyqësore.
Të lidhura
None found
Përfaqësuesi i Jovanovit bëri të ditur se do të ofrohet një garanci pasurore prej rreth 200.000 eurosh, si siguri se ai nuk do të largohet nga Maqedonia. Megjithatë, garancia nuk është e domosdoshme, pasi ligji parashikon maksimumi një vit paraburgim për Jovanovin dhe ky afat përfundon pas tri ditësh.
Dokumentacioni për garancinë po shqyrtohet ende në Prokurorinë Publike. Gjykata nuk mund të marrë vendim për të derisa dokumentet të kthehen në Gjykatën Penale.
Gjykata Penale njoftoi se deri tani janë zhvilluar 49 seanca për çështjen “Pulse”, pa u shtyrë asnjëra. Në proces janë paraqitur më shumë se 1.300 prova materiale dhe 45 dëshmitarë./Telegrafi/
