LSDM ka kërkuar shkarkimin e menjëhershëm të ministrit Ivan Stoilkoviq, duke e akuzuar se është përfshirë në aktivitete politike në Serbi dhe se mbështet, sipas kësaj partie, një “agjendë serbo-ruse”.
Të lidhura
None found
Reagimi i partisë socialdemokrate vjen pas paraqitjes së Stoilkoviqit në Manastir përkrah Milica Gjurgjeviq Stamenkovskit – Zavetnica, ministre në qeverinë teknike të Serbisë. Në qëndrimin e saj, LSDM përmend pikëpamjet e saj për NATO-n, Rusinë dhe luftën në Ukrainë, si edhe deklaratat e bëra prej saj për Srebrenicën dhe Ratko Mladiqin.
“Ajo deklaroi publikisht: nuk pati gjenocid në Srebrenicë. Kjo bie ndesh me vendimet përfundimtare të gjykatave ndërkombëtare. Për Ratko Mladiqin ajo shprehet: një gjeneral i Republikës Srpska, një njeri që mbrojti popullin. Mladiqi është një kriminel lufte i dënuar”, thuhet në reagimin e LSDM-së.
Partia e akuzon gjithashtu Stoilkoviqin se mbështet presidentin serb Aleksandar Vuçiq dhe se merr pjesë në veprimtari të lidhura me Serbinë. Sipas pretendimeve të LSDM-së, ai ka qenë i përfshirë edhe në organizimin e transportit për një tubim në Beograd.
LSDM kërkon që Stoilkoviqi të largohet nga posti, duke e cilësuar të papërshtatshme pjesëmarrjen e tij në aktivitete politike në Serbi për një ministër të RMV-së.
