Garry Kasparov, ish-kampion bote në shah dhe disident rus, ka bërë të ditur se autoritetet e sigurisë në Lituani dhe Shtetet e Bashkuara e kanë paralajmëruar atë dhe bashkëpunëtorin e tij të vjetër, Ivan Tyurin, për një kërcënim serioz ndaj jetës së tyre.
Të lidhura
None found
Kasparov, i cili prej vitesh jeton në mërgim jashtë Rusisë, e ndau këtë informacion përmes një postimi në rrjetet sociale të martën.
Sipas deklaratës së tij, emrat e të dyve janë përfshirë në një listë personash që mund të jenë objektiv i një vrasjeje. Ai tha se njoftimi nuk ishte i papritur për të, megjithëse e përjetoi si një tronditje.
“Nuk u habita kur mësova se unë dhe bashkëpunëtori im i hershëm, si dhe bashkëthemeluesi i Forumit të Rusisë së Lirë, Ivan Tyurin, ndodhemi në një listë objektivash për vrasje. Megjithatë, lajmi mbetet tronditës”, shkroi Kasparov.
Ai tregoi se shërbimet e sigurisë nga Lituania dhe SHBA-ja i kishin vënë në dijeni për rrezikun dhe u kishin rekomanduar të ndërmerrnin masa parandaluese.
“Na thanë se jetët tona ishin të kërcënuara dhe se duhej të merrnim masa parandaluese. Unë i kam marrë këto masa dhe do të vazhdoj ta bëj këtë”, u shpreh ai.
Kasparov njihet si një prej kritikëve më të ashpër të Kremlinit dhe presidentit rus Vladimir Putin. Ai është larguar prej vitesh nga Rusia dhe vazhdon të kundërshtojë publikisht politikat e Moskës.
