Dështon ekzekutimi me injeksion vdekjeprurës në SHBA, 50-vjeçarja përfundon në spital
Ekzekutimi i 50-vjeçares Christa Gail Pike në Tenesi dështoi pasi ajo mbeti gjallë edhe pas administrimit të dy dozave të pentobarbitalit. Pike, e cila ndodhet në burgun e sigurisë së lartë Riverbend në Nashville, u dërgua në një spital pas ndërprerjes së procedurës. Sipas avokatëve të saj, ajo kishte ende rrahje zemre dhe dëgjohej duke marrë frymë, ndërsa ekipet mjekësore nisën t’i ofronin trajtim.
Gjatë procedurës, e cila nisi mbrëmjen e së mërkurës, Pike iu administruan dy doza të injeksionit vdekjeprurës. Dëshmitarët raportuan se perdet e dhomës së ekzekutimit u mbyllën disa herë dhe se Pike dëgjohej duke gërhitur. Avokatët e saj paraqitën një kërkesë urgjente për ndalimin e ekzekutimit dhe për ofrimin e menjëhershëm të kujdesit mjekësor.
Pike ishte dënuar me vdekje për vrasjen e 19-vjeçares Colleen Slemmer në vitin 1995, kur Pike ishte vetëm 18 vjeçe. Ajo dhe bashkëpunëtorët e saj e kishin çuar Slemmer në një zonë pyjore, ku e vranë pas një sulmi brutal. Pike u dënua me vdekje në vitin 1996 dhe ishte e vetmja grua në burgun e të dënuarve me vdekje në Tenesi.
Avokatët e Pike kishin ngritur më herët shqetësime lidhur me protokollin e ekzekutimit, përfshirë problemet e mundshme me venat dhe mungesën e një plani emergjence në rast se procedura nuk do të shkonte sipas parashikimit. Nga ana tjetër, Departamenti i Shërbimeve Korrektuese të Tenesit deklaroi se zyrtarët ndoqën çdo hap të protokollit shtetëror të miratuar dhe se ilaçi i përdorur ishte konsideruar efektiv.
Pas incidentit, guvernatori i Tenesit, Bill Lee, urdhëroi një hetim të plotë dhe të pavarur për të përcaktuar se çfarë shkoi keq. Ai njoftoi gjithashtu pezullimin e ekzekutimeve të tjera të planifikuara për pjesën e mbetur të vitit 2026. Ndërkohë, gjendja shëndetësore e Pike pas transportimit në spital mbetet e paqartë.
/vizionplus.tv
